Michael Mann plagoset aksidentalisht në këmbë në një poligon në Los Angeles, përfaqësuesi: Plagë e lehtë

Regjisori amerikan Michael Mann u plagos aksidentalisht në këmbë të shtunën pasdite, në një poligon qitjeje në Los Angeles. Sipas burimeve të cituara nga TMZ, 83-vjeçari po stërvitej në qitje në objekt të autorizuar rreth orës 16:00 me orën lokale, kur arma i shkrepi ndërsa po përpiqej ta vendoste në këllëf.

Në spital me ambulancë

Mann u transportua me ambulancë në një spital vendor për ndihmë mjekësore. Sipas raportimeve që citojnë autoritetet lokale, ngjarja u konsiderua aksidentale, shkruan ATSH. Burimet e TMZ-së e përshkruan plagën si “nënlëkurore dhe të lehtë”, duke shtuar se regjisori është prej dekadash një qitës i sprovuar.

Më vonë, përfaqësuesi i Mann-it konfirmoi se arma “shkrepi aksidentalisht ndërsa ishte në këllëf”, duke shkaktuar një plagë sipërfaqësore. Sipas deklaratës, regjisori mori mjekimin e nevojshëm dhe po lirohet nga spitali.

Lajmi u publikua fillimisht nga TMZ të dielën në mëngjes sipas orës së Los Angelesit, mbi bazën e burimeve të pa emëruara. Disa orë më vonë, faqja e përditësoi artikullin me deklaratën e përfaqësuesit të regjisorit, e cila konfirmoi në thelb versionin e parë: një shkrepje aksidentale e armës, pa pasoja të rënda.

Autori i “Heat”

Mann ka një karrierë disadekadëshe në Hollywood. Ndër filmat e tij më të njohur janë “Heat”, “The Insider” dhe “Collateral”. Deri në publikimin e lajmit nga ATSH nuk kishte informacion të konfirmuar për gjendjen e tij pas mjekimit, ndërsa deklarata e mëvonshme e përfaqësuesit qartësoi se plaga nuk është e rëndë.