Rama prezanton “Pasqyrë Albania”: çdo ankesë e gjurmueshme si pako DHL, SMS kur institucioni vonon përgjigjen

Kryeministri Edi Rama prezantoi të dielën në Tiranë “Pasqyrë Albania”, një platformë digjitale që synon të vendosë në një dritare të vetme të gjitha institucionet e shtetit, nga ministritë te bashkitë. Platforma u shfaq në një bashkëbisedim me ekspertët e Agjencisë Kombëtare të Shoqërisë së Informacionit (AKSHI), që po e konfigurojnë.

“Çdo institucion do të jetë në këtë Pasqyrë”, tha Rama, duke shtuar se brenda saj është edhe portali e-Albania. Sipas Top Channel, platforma mund të përdoret në kompjuter e telefon dhe mund të instalohet si aplikacion në Android dhe iOS.

Katër shtyllat e platformës

Eksperti i AKSHI-t, Saimir Kapllani, shpjegoi se platforma ndërtohet mbi katër shtylla. E para, “Shih”, tregon ku investohen paratë publike në çdo bashki dhe ecurinë e reformave prioritare, përfshirë projektet e pezulluara apo të vonuara. E dyta, “Kupto”, publikon vendimet dhe projektvendimet e këshillave bashkiakë, të ngarkuara që nga shtatori, me një asistent virtual që i përmbledh. Shtylla “Bashkëvendos” lidhet aktualisht me Regjistrin e Konsultimeve Publike, ku qytetarët japin mendim për aktet në konsultim.

Në hapësirën personale, me llogarinë e e-Albania, qytetari sheh në kohë reale çdo aplikim, shërbim e ankesë. Kur afati ligjor i një shërbimi kalon pa përgjigje, platforma e sinjalizon dhe qytetari merr një SMS me lidhje për të paraqitur ankesë, e cila regjistrohet zyrtarisht.

“Pako DHL” për çdo kërkesë

Rama e quajti humbjen e kërkesave në burokraci “thembrën e Akilit” të marrëdhënies mes qytetarit dhe shtetit. Ai tha se çdo hall, kërkesë apo ankesë do të ndiqet si një pako DHL-je, në çdo hallkë, që eprorët të shohin ku ngec. “Dhënia e përgjigjes në kohë është një detyrim”, theksoi ai. Në ditët në vijim pritet edhe një dritare për komunikim të drejtpërdrejtë me institucionet, ndërsa inteligjenca artificiale do të shtohet gradualisht, pasi sistemi të trajnohet.