“Gjykimi i Fundit” zbulon sekretet e Michelangelos: furça si krehër dhe një autoportret i fshehur

Mirëmbajtja e jashtëzakonshme e “Gjykimit të Fundit” në Kapelën Sistine po hedh dritë të re mbi mënyrën se si punonte Michelangelo. Sipas KultPlus, restauruesit e Laboratorit të Restaurimit të Muzeve të Vatikanit, të udhëhequr nga Paolo Violini, i kanë përmbledhur zbulimet në një libër të ri, të botuar nga Edizioni Musei Vaticani.

Një furçë si krehër

Sipas tyre, Michelangelo përdorte shpesh një furçë me shumë maja, në formë krehëri, ndoshta të projektuar prej tij, me të cilën pikturonte disa vija paralele me një të vetme lëvizje. Vijat e kryqëzuara dhe ndryshimi i drejtimit të penelatave krijonin hije e kontraste që u japin figurave një pamje tredimensionale, pothuajse skulpturore.

Fytyra e fshehur

Në pjesën e poshtme të skenës së ringjalljes, restauruesit vënë në dukje një autoportret të fshehur në draperinë e një figure alegorike të vdekjes: një fytyrë e dobësuar dhe e rrudhur që i ngjan tipareve të artistit. Ky detaj lidhet me rënien e Michelangelos nga skelat në vitin 1541, kur ai u lëndua rëndë në këmbë.

Puna u krye në shkurt dhe mars nga 30 restaurues, me dy turne, për 30 ditë. Ata hoqën një shtresë të bardhë laktati kalciumi, të grumbulluar gjatë rreth tri dekadave pas restaurimit të viteve ’90 nga djersa e vizitorëve, duke përdorur kompresa me ujë të distiluar dhe letër japoneze për të mbrojtur sipërfaqen. Pas pastrimit u rikthye kontrasti mes dritës dhe hijes. Libri, “Michelangelo 2026”, është kuruar nga drejtoresha e Muzeve të Vatikanit, Barbara Jatta, dhe Fabrizio Biferali.