“Akordet e Kosovës” nisin sonte në Prishtinë: tri netë festivali dhe, për herë të parë, kënga për fëmijë

Festivali i këngës “Akordet e Kosovës” nis sonte, më 30 tetor, në Prishtinë, me edicionin e tij të katërt. Përgjatë tri netëve, deri më 1 nëntor, në skenën e sallës “1 Tetori” do të ngjitet kënga për të rritur dhe, për herë të parë, edhe një edicion i veçantë kushtuar këngës për fëmijë.

Nata e tretë për më të vegjlit

Risinë e bëri të ditur drejtoresha e përgjithshme e Radio Televizionit të Kosovës, Zana Spahiu, në një intervistë për përgatitjet. “Dy netët e para e kemi edicionin e Festivalit të Këngës për të Rritur, ndërsa në natën e tretë, për herë të parë, edicionin e Këngës për Fëmijë”, tha ajo. Në natën e fundit do të performojnë 15 artistë të rinj, duke e kthyer festivalin edhe në një hapësirë për zërat e rinj të muzikës shqiptare.

Ministrja e Kulturës dhe Turizmit, Saranda Bogujevci, vizitoi sallën ku po zhvilloheshin provat dhe theksoi rëndësinë e ruajtjes së trashëgimisë muzikore dhe të krijimit të hapësirave për talentet e reja. “Ne kemi shumë fëmijë të talentuar dhe është kënaqësi e madhe që sot u jepet mundësia të performojnë në një skenë të madhe”, deklaroi ajo. Për përgatitjet foli edhe nënkryetarja e Bordit të RTK-së, Xheraldina Cërnobregu.

Prapaskenat në radio

Festivali do të ndiqet jo vetëm në skenë, por edhe prapa saj. Radio Kosova 2 sjell një program të veçantë në orën 21:00, me moderimin e Trendeline Bucollit dhe Valtona Kelmendit, i cili do t’i afrojë dëgjuesit me përgatitjet, emocionet dhe përjetimet e artistëve gjatë netëve të festivalit.

Intervistat do t’i realizojnë Laura Kryeziu dhe Vjosa Husaj, ndërsa programi transmetohet nga studioja lëvizëse e Radio Kosovës, e vendosur në sallën “1 Tetori”.