Mickoski u propozon studentëve shujtë 4,500 denarë në muaj, vetëm për ushqim përmes aplikacionit

Kryeministri i Maqedonisë së Veriut, Hristijan Mickoski, propozoi të enjten rritjen e shujtës mujore të studentëve në 4,500 denarë, nga rreth 3,500 denarë që merren sot në kartela debiti, raporton Portalb. Propozimi u bë në një takim me përfaqësues të parlamenteve studentore nga universitetet e vendit, ku mori pjesë edhe ministrja e Arsimit dhe Shkencës, Vesna Janevska.

Vetëm për ushqim, me filtër digjital

Sipas propozimit, mjetet do të shpenzoheshin vetëm për ushqim, përmes një funksioni të ri, “M-Shujta Studentore”, në aplikacionin shtetëror M-Shërbime. Studentët do të mund të blinin vetëm në restorante, market dhe lokale nga një listë e miratuar, ndërsa aplikacioni do të përdorte inteligjencën artificiale për të bllokuar blerjet si alkooli dhe cigaret.

Pasi studentët ta shpenzojnë shumën mujore, disa lokale do të ofronin zbritje prej 20 deri në 25%. Si shembull u përmend një vakt prej 100 denarësh, që me 25% zbritje do të kushtonte 75 denarë.

Topi te studentët

Propozimi ende nuk është miratuar dhe nuk ka datë fillimi. Qeveria pret përgjigjen e përfaqësuesve studentorë në një takim të ardhshëm, ndërsa Janevska tha se beson që zgjidhja do të gjendet shpejt. Në takim u diskutua edhe për kushtet në konvikte, ndërtimin dhe rinovimin e tyre, si dhe për kampusin e Universitetit “Nënë Tereza”.

Mickoski pohoi se standardi i jetesës së studentëve është përmirësuar mes viteve 2022 dhe 2026. Ai pranoi se Gjermania ka ende standarde më të mira, por tha se dallimi është ngushtuar. Ai kujtoi edhe se Universiteti “Shën Kirili dhe Metodi” i Shkupit renditej më lart në listën e Shangait rreth 20 vjet më parë.