Van Gogh “zbret” në Prishtinë: ekspozita imersive në Deep Space hapet deri më 3 nëntor

Prishtina ka që nga e marta një ekspozitë ndryshe nga zakonisht: vepra e Vincent van Gogh-ut (1853–1890) paraqitet në formë imersive në hapësirën Deep Space Prishtina, në ish-ndërtesën “Gërmia” në sheshin Skënderbeu. Ekspozita është realizuar nga Ambasada e Mbretërisë së Holandës në Kosovë në bashkëpunim me Prishtina Music Conference dhe qëndron e hapur nga 20 tetori deri më 3 nëntor.

Në vend të tablove në mure, vizitorët përjetojnë pikturat e artistit holandez përmes projeksioneve, tingullit dhe lëvizjes, një format që ndërthur teknologjinë me artin dhe që synon të përfshijë të gjitha shqisat.

Van Gogh, nga tregtar arti te piktor

Ambasadorja holandeze në Kosovë, Astrid de Vries, kujtoi në hapje se Van Gogh-u arriti të krijojë art mbresëlënës pavarësisht dështimeve të shumta në jetë. Ajo veçoi një fakt pak të njohur: piktori kaloi një vit në Londër në vitet 1873–1874, ku punonte si tregtar arti dhe jo ende si piktor.

Ministrja e Kulturës, Saranda Bogujevci, citoi fjalët e njohura të artistit “Ëndërroj të pikturoj dhe më pas pikturoj ëndrrat e mia”, duke i lidhur ato me rrugën e Kosovës drejt pavarësisë. “Jemi një vend i vogël me ëndrra të mëdha”, tha ajo.

Shkollat ndër vizitorët e parë

Kryetari i Prishtinës, Përparim Rama, e cilësoi kryeqytetin si qytet me komunitet të ri dhe energjik dhe tha se përvoja të tilla u japin të rinjve më shumë arsye të besojnë në atë që është e mundur. Sipas tij, shkollat e Prishtinës tashmë po i sjellin nxënësit në ekspozitë.

Sipas programit të publikuar nga platforma e eventeve Ka’ Po Dalim, seancat për publikun nisin çdo orë gjatë ditës, ndërsa bileta për ekspozitën kushton 5 euro për seancë.