Turqi, mijëra protestojnë në Stamboll dhe Ankara kundër arrestimit të gazetarëve: “Nuk do të na mbyllni gojën”

Mijëra veta protestuan të shtunën në Stamboll dhe Ankara kundër asaj që e quajnë presion në rritje ndaj gazetarëve në Turqi: arrestime, mbyllje mediash dhe emërim administratorësh qeveritarë në institucione mediatike, raportoi AFP, e cituar nga ATSH. Në tubime morën pjesë kryesisht gazetarë, përfaqësues të organizatave të të drejtave të njeriut dhe anëtarë të partive opozitare.

Sipas të dhënave të policisë, vetëm në pjesën aziatike të Stambollit u mblodhën të paktën 3.000 veta. Protestuesit mbanin fotografi të gazetarëve të burgosur dhe brohorisnin: “Mjaft. Nuk mund të marrim më frymë”, “Nuk do të na mbyllni gojën” dhe “Nuk do t'i nënshtrohemi presionit”.

Halk TV dhe T24 në shënjestër

Sindikata e Gazetarëve të Turqisë bën me dije se në dy muajt e fundit janë burgosur 11 gazetarë dhe janë mbyllur disa media. Në fillim të tetorit policia bastisi Halk TV, një nga kanalet informative më të ndjekura në vend, ndërpreu transmetimet e tij dhe vendosi aty një administrator të emëruar nga qeveria. Më herët, autoritetet kishin bllokuar faqen dhe llogaritë në rrjetet sociale të medias digjitale T24, me arsyetimin se përhapte “propagandë LGBT”.

Liria e shtypit në Turqi është kufizuar gjithnjë e më shumë që pas grushtit të dështuar të shtetit të vitit 2016, i ndjekur nga gjyqe të shumta dhe censurë në internet. Organizatat e të drejtave të njeriut thonë se presioni ndaj gazetarisë së pavarur është shtuar ndjeshëm në javët e fundit. Tubimet e së shtunës u zhvilluan njëkohësisht në dy qytetet më të mëdha të vendit, me gazetarët dhe aktivistët që kërkuan lirimin e kolegëve të tyre të burgosur.