Irani në Doha për ditën e tretë të bisedimeve: plan dyditor për Hormuzin, Trump nuk nxiton për marrëveshje

Negociatorët iranianë zhvilluan të dielën në Doha ditën e tretë radhazi të bisedimeve me ndërmjetësit katarë, me synimin për një marrëveshje që t’i japë fund luftës mes SHBA-së, Izraelit dhe Iranit. Sipas ATSH-së, që citon një zyrtar të pa emëruar përmes Reuters-it, takimet zhvillohen në një kohë shqetësimi për një përshkallëzim të mundshëm pas zgjedhjeve të mesmandatit në SHBA, më 3 nëntor.

Nga shtatë në dy ditë

Ministri i Jashtëm iranian, Abbas Araghchi, tha se bisedimet vazhdojnë dhe po përparojnë, ndërsa diskutimi për një propozim dyditor ende nuk ka arritur në përfundim. “Irani është i përgatitur si për mbrojtjen, ashtu edhe për diplomacinë”, deklaroi ai. Sipas Al Jazeera-s, oferta e Teheranit për rihapjen e pjesshme të Ngushticës së Hormuzit është shkurtuar nga shtatë në dy ditë pas një marrëveshjeje të mundshme, ndërsa Irani pret përgjigjen e Uashingtonit.

Presidenti Donald Trump ka thënë se SHBA nuk do të nisë sulme të reja ndaj Iranit para zgjedhjeve dhe se negociatat “shkojnë mirë”, por që nuk nxiton për një marrëveshje paqeje. Ai la të hapur mundësinë e veprimeve të tjera ushtarake më pas: “Na duhet ende të merremi me një a dy objekte, por këtë mund ta bëjmë për 10 minuta.” Sekretari i Shtetit, Marco Rubio, tha se Trump ende nuk ka vendosur për sulme të reja dhe preferon një zgjidhje diplomatike.

Teherani në gatishmëri

Udhëheqësi suprem Mojtaba Khamenei u ka kërkuar forcave të armatosura të jenë gati për çdo sulm të mundshëm dhe ka bërë thirrje për “parandalim maksimal”. Televizioni shtetëror shfaqi të dielën pamje raketash e dronësh të nxjerrë nga depot nëntokësore. Sipas Al Jazeera-s, të paktën katër cisterna u goditën të premten dhe të shtunën, pasi refuzuan të koordinoheshin me autoritetin iranian të ngushticës. Lufta, që nisi me sulmet amerikano-izraelite të 28 shkurtit, ka tetë muaj që trazon tregjet e energjisë.