Polonia në krizë kushtetuese: pezullohet kreu i Tribunalit, Nawrocki ndërpret vizitën në Senegal

Polonia u zhyt të premten në një përshkallëzim të ri të përplasjes për drejtësinë, pasi kryetari i Tribunalit Kushtetues, Bogdan Święczkowski, dhe zëvendëskryetari Bartłomiej Sochański u pezulluan nga detyra. Sipas AP-së, vendimin e morën gjyqtarë të zgjedhur nga shumica aktuale parlamentare, ndërsa gjyqtarja Anna Korwin-Piotrowska njoftoi se po merrte drejtimin e Tribunalit.

“Grusht shteti”

Tribunali reagoi në rrjetin X duke e cilësuar veprimin “grusht shteti” gjyqësor. “Znj. Anna Korwin-Piotrowska nuk është gjyqtare e Tribunalit Kushtetues. Të gjithë personat që marrin pjesë në këto veprime po kryejnë krimin e grushtit të shtetit”, shkruhej në postim. Edhe drejtuesit e opozitës e dënuan vendimin si sulm ndaj rendit kushtetues.

Policia u vendos në ambientet e jashtme të gjykatës në Varshavë, pas kërkesave për të garantuar sigurinë e gjyqtarëve dhe punonjësve. Sipas policisë, efektivët nuk hynë në ndërtesë. Mbështetës të partisë opozitare “Ligj dhe Drejtësi” (PiS) u mblodhën jashtë në mbrëmje; tre persona u arrestuan pasi disa protestues hodhën sende drejt policisë dhe kapërcyen rrethimin.

Presidenti kthehet nga rruga

Presidenti Karol Nawrocki ndërpreu vizitën zyrtare në Senegal. “Në një moment si ky, presidenti duhet të jetë në Poloni. Po e ndërpres fluturimin drejt Senegalit. Po kthehem”, shkroi ai në X. Kryeministri Donald Tusk mbrojti veprimet, duke thënë se rikthimi i shtetit të së drejtës është detyrim dhe kërkon masa vendimtare.

Qeveria e Tusk kërkon të largojë gjyqtarët e emëruar gjatë qeverisjes së PiS-it nga 2015 deri në 2023, kur BE-ja e akuzonte gjykatën se ishte shumë e lidhur me qeverinë dhe se shpesh i jepte përparësi ligjit polak mbi atë evropian. Opozita dhe presidenti kundërshtojnë mënyrën se si qeveria po ndërhyn në funksionimin e saj.