Merz në Seul: Koreja e Veriut kërcënon sigurinë e Evropës me ushtarët që lufton krah Rusisë

Kancelari gjerman Friedrich Merz deklaroi në Seul se Koreja e Veriut po kërcënon lirinë në mbarë Evropën, duke dërguar ushtarë për të luftuar krah Rusisë në Ukrainë. Ai foli pas takimit me presidentin e Koresë së Jugut, Lee Jae Myung, sipas agjencisë gjermane DPA të cituar nga ATSH. “Bota është e vogël, edhe në kohë lufte”, tha Merz, duke theksuar se siguria e dy vendeve është e lidhur drejtpërdrejt.

Armë në këmbim të ndihmës ushtarake

Sipas Merz-it, Rusia i dërgon armë Koresë së Veriut në këmbim të ndihmës që Phenjani i jep në luftën kundër Ukrainës. Koreja e Veriut i ka dërguar Rusisë sasi të mëdha municionesh dhe raketash, ndërsa shërbimi i inteligjencës i Koresë së Jugut vlerëson se rreth 15,000 ushtarë koreano-veriorë luftojnë me forcat ruse. Vëzhguesit besojnë se Moska i ofron Phenjanit ndihmë financiare, teknologji ushtarake dhe garanci sigurie.

Dy liderët ranë dakord të thellojnë bashkëpunimin në siguri dhe mbrojtje, me më shumë shkëmbime ushtarake, stërvitje të përbashkëta dhe ndarje të informacionit të inteligjencës. Ata u bënë thirrje edhe kompanive gjermane dhe koreano-jugore të mbrojtjes të bashkëpunojnë më ngushtë.

Raketa para vizitës

Para se Merz të mbërrinte në Seul, ushtria koreano-jugore raportoi se Koreja e Veriut kishte lëshuar rreth 10 raketa balistike me rreze të shkurtër drejt Detit të Lindjes, të njohur edhe si Deti i Japonisë. Javën e kaluar Seuli propozoi rifillimin e bisedimeve me Veriun, por Phenjani nuk ka treguar gatishmëri. Lee tha se Merz i ofroi mbështetjen e Gjermanisë për dialogun ndër-korean.

Në librin e përshtypjeve, Merz shkroi se Gjermania dhe Koreja lidhen nga “përvoja e dhimbshme e ndarjes” dhe shprehu shpresën që koreanët të përjetojnë ribashkimin në liri, ashtu si gjermanët pas rënies së Murit të Berlinit. Seuli është ndalesa e fundit e turit të tij aziatik, që përfshiu Singaporin dhe Japoninë; më 30 tetor ai pritet të vizitojë zonën e çmilitarizuar mes dy Koreve.