Meloni: Synoj edhe pesë vjet në krye të qeverisë, presidenca e Republikës nuk është në planet e mia

Kryeministrja italiane Giorgia Meloni thotë se nuk synon postin e presidentes së Republikës dhe se e ka mendjen te një mandat i dytë në krye të qeverisë. Deklaratat e saj janë pjesë e librit të ri të gazetarit Bruno Vespa, “Historia e Republikës së Dytë. Nga Berlusconi te Meloni, nga Prodi te Schlein”, që sipas agjencisë ANSA, të cituar nga ATSH, del në qarkullim të hënën.

“Plotësisht e përqendruar”

“Jam plotësisht e përqendruar në përfundimin me sukses të këtij mandati”, thotë Meloni, duke shtuar se synon të fitojë besimin e italianëve për t’u rikonfirmuar edhe për pesë vjet të tjera. Presidenca, sipas saj, “nuk është në planet e mia”.

Megjithatë, kryeministrja nuk e kursen të majtën. Ajo pyet pse duhet të shkaktojë skandal fakti që “një personalitet me kulturë konservatore mund të synojë një ditë atë post”.

Akuza për “racizëm kulturor”

“E konsideroj të padurueshëm këtë racizëm kulturor”, shkruan Meloni, sipas së cilës gjysma ose më shumë e italianëve trajtohen si qytetarë “të dorës së dytë”, shpesh nga njerëz që në rini brohorisnin për Bashkimin Sovjetik. Ajo shton se reagimet histerike të së majtës sa herë përmendet mundësia që një shumicë e qendrës së djathtë të propozojë presidentin “tregojnë shumë për konceptin pronësor që ata kanë për institucionet”.

Siç e tregon edhe titulli, libri i Vespës, që del në qarkullim të hënën, përshkon politikën italiane nga Silvio Berlusconi te Meloni dhe nga Romano Prodi te liderja e Partisë Demokratike, Elly Schlein.