“LA RREMË” mbyll edicionin zero në Prishtinë me masterclass, debat për teatrin dhe koncert final

Festivali Ndërkombëtar i Teatrit “LA RREMË” përmbyll sonte në Prishtinë edicionin e tij zero, dy ditë të ndërtuara rreth shfaqjes, bisedës dhe muzikës. Festivali u hap të premten në Sallën e Kuqe të Pallatit të Rinisë me “Taverna Mirësia – Mario, Bella, Anastasia” të regjisorit Mario Banushi, një vepër që trajton kujtimet, mungesën dhe lidhjet njerëzore përmes një gjuhe skenike që e fton publikun të përjetojë dhe të reflektojë.

Klasikët dhe e ardhmja e teatrit

E shtuna nisi me masterclass-in “Klasikët në skenën bashkëkohore” të regjisorit Dino Mustafiq në Teatrin Kombëtar të Kosovës, partner i festivalit. Në mesditë, në Qendrën Barabar, u zhvillua diskutimi “Pse ende mblidhemi? Teatri në një terren që ndryshon”, me Darko Lukić, Doruntina Basha, Marko Bratuš dhe Ilina Perianova, i moderuar nga Aurela Kadriu. Në mbrëmje “Taverna Mirësia” u shfaq për herë të dytë, ndërsa festivali mbyllet me koncertin e Ibadete Ramadanit dhe bendit të saj në Menzën “Ramiz Sadiku” dhe me një mbrëmje me DJ Erletën.

Bogujevci: Një hapësirë e re për Prishtinën

Ministrja e Kulturës, Saranda Bogujevci, e përshëndeti festivalin në rrjetet sociale. “Ky festival i shton Prishtinës një hapësirë të re për teatrin bashkëkohor”, shkroi ajo, duke kujtuar edhe Muharrem Qenën, një nga figurat e rëndësishme të teatrit kosovar, me të cilin e lidhi festivalin. Bogujevci uroi ekipin organizues dhe i uroi festivalit vazhdimësi.

Edicioni zero u realizua në partneritet me Teatrin Kombëtar të Kosovës dhe me mbështetjen e Ministrisë së Kulturës, Komunës së Prishtinës, Qendrës Barabar dhe disa sponsorëve privatë.