Izraeli pa fitues pas zgjedhjeve: Likudi kërkon hetim për “mashtrim” të partive arabe, Eisenkot nuk dorëzohet

Zgjedhjet parlamentare në Izrael nuk nxorën një fitues të qartë. Me rreth 85% të votave të numëruara, sipas ATSH-së që citon Times of Israel, blloku i kryeministrit Benjamin Netanyahu parashikohej të merrte 53 mandate, ndërsa blloku i Gadi Eisenkotit 48, larg shumicës prej 61 vendesh në Knessetin me 120 deputetë. Partitë arabe, Lista e Përbashkët dhe Ra'am, pritet të fitojnë së bashku 19 mandate, 12 dhe 7, një rezultat që cilësohet historik.

Likudi flet për “vjedhje” të zgjedhjeve

Partia e Netanyahut, Likudi, u kërkoi policisë dhe shërbimit të sigurisë së brendshme Shin Bet të hetojnë partitë arabe për mashtrim. Likudi thotë se ka dorëzuar “qindra” prova për parregullsi të mundshme, mes tyre blerje votash, kërcënime, dhunë, falsifikim dokumentesh dhe programe të paligjshme për mobilizimin e votuesve. Komisioni Qendror i Zgjedhjeve po e shqyrton ankesën, por akuzat nuk janë provuar dhe një zyrtar i komisionit i kishte hedhur poshtë më herët pretendimet për mashtrim.

Eisenkot: na presin ditë të gjata

Gadi Eisenkot, kandidati kryesor i opozitës, pranoi në X se rezultatet pothuajse përfundimtare e lënë partinë e tij në disavantazh, por tha se ekipi i tij mbetet i përqendruar te ndryshimi i vendit dhe krijimi i një qeverie të re që i përkushtohet shërbimit ushtarak. Ai e akuzoi qeverinë aktuale për dështimet e 7 tetorit dhe falënderoi “qindra mijëra” qytetarë që i dhanë besimin.

Lideri i Listës së Përbashkët, Yousef Jabareen, tha se partia e tij është gati të bashkëpunojë me një qeveri të udhëhequr nga opozita për ta larguar Netanyahun nga pushteti, por përjashtoi pjesëmarrjen e drejtpërdrejtë në koalicion në rrethanat aktuale. Ish-zëdhënësi i qeverisë, Eylon Levy, i tha Euronews-it se opsionet janë një qeveri uniteti, një qeveri pakice ose zgjedhje të reja. Ndërkohë, Netanyahu mbetet në krye të qeverisë si kryeministër në detyrë.