Greva e përgjithshme në Itali: USB flet për 1.5 milionë në rrugë, përplasje me policinë në Romë e Torino

Italia u përfshi të premten nga një grevë e përgjithshme e thirrur nga sindikata bazë USB, me protesta kundër rritjes së kostos së jetesës dhe riarmatimit në Evropë. Sipas vlerësimeve të sindikatës, rreth 1.5 milionë persona marshuan në më shumë se 60 qytete: studentë, punonjës, pensionistë, fermerë dhe familje. Shumica e tubimeve kaluan pa incidente, por në mbrëmje situata u tensionua në Romë dhe Torino.

Barrikada pranë Koloseut

Në Romë, një grup protestuesish u shkëput nga marshimi kryesor pranë Koloseut, ngriti barrikada, shkuli tabela rrugore dhe u vuri flakën koshave të mbeturinave. Përplasjet u ashpërsuan në lagjen Testaccio, ku u hodhën shishe drejt policisë, e cila përdori autobotët me ujë. Tetë persona u ndaluan. Si masë paraprake u mbyllën sheshet Montecitorio dhe Colonna, pranë zyrës së kryeministres Giorgia Meloni.

Në Torino policia ndërhyri me autobot uji në sheshin Castello, ku protestuesit iu afruan kordonit që ruante prefekturën. Në Mestre shtatë policë mbetën lehtë të lënduar, ndërsa në Vicenza dhjetë persona, protestues dhe policë, pësuan lëndime pranë autostradës. Në Milano rreth 30 mijë vetë marshuan dhe bllokuan për rreth një orë e gjysmë një pjesë të unazës lindore; pas marshimit u shfaqën mbishkrime kërcënuese ndaj Melonit dhe zëvendëskryeministrit Matteo Salvini.

Portet kundër trafikut të armëve

Sipas ATSH-së, mbi 100 struktura portuale në 17 vende iu bashkuan nismës kundër transportit të armëve; në Genova punëtorët e portit bllokuan herët në mëngjes një pjesë të zonës me goma dhe fishekë tymi. Salvini kishte nxjerrë një urdhër që ndalonte grevat në transport para festës së 1 nëntorit, por USB deklaroi se nuk do ta respektonte. Ministri i Brendshëm, Matteo Piantedosi, e kishte cilësuar “problematike” fundjavën dhe kishte paralajmëruar kontrolle të shtuara.

USB bëri të ditur se mobilizimi do të vijojë edhe në ditët në vijim.