Gazi në Europë arrin 97.64 euro për MWh, çmimi më i lartë në gati katër vjet

Çmimi i gazit natyror në Europë u ngjit të hënën në nivelin më të lartë në gati katër vjet. Në bursën e Amsterdamit, gazi për dorëzim muajin e ardhshëm arriti 97.64 euro për megavat-orë, pranë kufirit simbolik prej 100 eurosh, raporton ATSH duke cituar agjencinë DPA.

Krahasuar me të premten, rritja ishte gati 3%. Që nga fillimi i tetorit çmimi është rritur me rreth një të tretën, ndërsa që nga fillimi i vitit 2026 është më shumë se trefishuar. Një kërcim i ngjashëm u regjistrua në fillim të luftës në Ukrainë, kur çmimi kaloi 300 euro për megavat-orë.

Hormuzi dhe depot

Shkaku kryesor është lufta me Iranin. Një pjesë e gazit natyror të lëngshëm që transportohet me anije kalon nga Ngushtica e Hormuzit, ku trafiku detar pothuajse ka ndaluar, duke e vështirësuar furnizimin.

Presion shtesë krijon edhe nevoja e Europës për të mbushur rezervat para dimrit. Gjermania, ekonomia më e madhe e BE-së, po përpiqet prej disa javësh të shtojë rezervat e saj. Aktualisht depot gjermane janë të mbushura mbi 61%, ndërsa një vit më parë në të njëjtën periudhë ishin rreth 75%.

Rritja e çmimeve me shumicë nuk kalon menjëherë në faturat e familjeve, sepse pjesa më e madhe e furnizimit mbulohet me kontrata afatgjata. Megjithatë, sipas një analize të portalit Verivox të cituar nga DPA, çmimet e gazit për familjet në landin gjerman Baden-Württemberg janë rritur 22% gjatë 12 muajve të fundit.