Equinoxe Europe për herë të parë në Shqipëri: skenaristë europianë në Durrës, mes tyre dy projekte shqiptare

Durrësi është kthyer këto ditë në një pikë takimi për skenaristë dhe kineastë nga vende të ndryshme të Europës. Për herë të parë, Shqipëria pret Equinoxe Europe, programin ndërkombëtar për zhvillimin e skenarëve, të sjellë nga Qendra Kombëtare e Kinematografisë (QKK).

Mbi 30 vjet përvojë

Sipas QKK-së, programi ka një histori prej më shumë se 30 vitesh dhe mbështet zhvillimin e skenarëve filmikë përmes punës së drejtpërdrejtë të autorëve me profesionistë dhe konsulentë të industrisë. Në këtë edicion, rreth 10 konsulentë profesionistë skenari nga pjesë të ndryshme të botës punojnë me autorët për të përmirësuar dhe zhvilluar tekstet e tyre, me synimin që projektet të përgatiten sipas standardeve të produksioneve të ardhshme ndërkombëtare.

Beqiri dhe Treni mes projekteve

Mes projekteve të përzgjedhura këtë vit janë edhe dy shqiptare, të regjisorëve të rinj Erenik Beqiri dhe Redi Treni, të cilat punohen krah projekteve të tjera premtuese europiane. Beqiri është i njohur për filmin e shkurtër “The Van” (“Furgoni”), që konkurroi në Festivalin e Kanës në vitin 2019.

QKK e sheh programin si një mënyrë për të forcuar lidhjet mes kineastëve shqiptarë dhe industrisë europiane, si dhe për të rritur cilësinë artistike të projekteve vendase përmes shkëmbimit të përvojës dhe ekspertizës.

Sipas institucionit, sjellja e programit në Shqipëri është pjesë e përpjekjeve për ta hapur kinemanë shqiptare ndaj tregut ndërkombëtar, me theks te formimi profesional dhe te mundësitë e reja për bashkëpunim që u krijohen kineastëve vendas, të cilët tani mund të punojnë me ekspertë ndërkombëtarë pa dalë nga vendi.