British Library hap botën e Agatha Christie-t: rreth 100 objekte të rralla, mes tyre makina e saj e shkrimit

British Library në Londër po përgatit një nga ekspozitat më të pritura të sezonit, kushtuar mbretëreshës së romanit policor. “Agatha Christie: A World of Mystery” hapet më 30 tetor dhe do të qëndrojë deri më 20 qershor 2027, duke shënuar 50-vjetorin e vdekjes së shkrimtares britanike.

Dorëshkrime dhe makina e shkrimit

Sipas Euronews, ekspozita mbledh rreth 100 objekte të rralla që ndjekin jetën, veprën dhe trashëgiminë e Christie-t. Mes tyre janë skica të hershme të dorëshkrimeve, shënime nga provimet e saj dhe makina personale e shkrimit. Ekspozita ndalet te fëmijëria e autores, te njerëzit që njohu dhe vendet ku udhëtoi, të cilat, sipas organizatorëve, formësuan personazhet dhe idetë e romaneve të saj.

Nga farmacia te Orient Express-i

Për ta futur publikun në atmosferën e librave, kuratorët kanë rindërtuar në madhësi natyrale ambiente farmacish, ku Christie punoi dhe mësoi për helmet që më pas do të shfaqeshin në intrigat e saj, si dhe një vagon të Orient Express-it të viteve 1920, që të kujton një nga romanet e saj më të famshëm. Euronews e përshkruan ekspozitën si një dhomë studimi të zbukuruar me shumë “gjurmë të shijshme”.

Agatha Christie shkroi gjithsej 95 libra, mes tyre 66 romane policore dhe rreth 15 përmbledhje tregimesh, dhe veprat e saj janë shitur në mbi 2 miliardë kopje në mbarë botën. Libri i fundit i botuar para vdekjes së saj në vitin 1976 ishte “Curtain: Poirot's Last Case”, ku detektivi i famshëm belg zgjidh rastin e tij të fundit.