25 tetori, Dita Ndërkombëtare e Artistëve: arti si gjuhë universale që ruan kujtesën dhe bashkon kulturat

Çdo vit, më 25 tetor, shënohet Dita Ndërkombëtare e Artistëve, një ditë kushtuar krijuesve në mbarë botën dhe kreativitetit, imagjinatës e talentit që ata sjellin në pikturë, skulpturë, fotografi, muzikë, letërsi dhe në shumë forma të tjera arti. Data përkon me ditëlindjen e Pablo Picassos, i cili lindi më 25 tetor 1881 në Málaga.

Në një shkrim me rastin e kësaj dite, agjencia ATSH e përshkruan artin si një gjuhë universale që frymëzon dhe bashkon njerëzit. Sipas saj, arti e pasuron jetën, i vë në provë këndvështrimet tona dhe na nxit të reflektojmë për botën që na rrethon.

Ruajtës të kujtesës

Artistët kanë një rol të veçantë në shoqëri: ata ruajnë kujtesën dhe trashëgiminë kulturore, japin forma emocioneve dhe ideve dhe ndërtojnë ura komunikimi mes kulturave dhe brezave të ndryshëm. Kjo vlen njësoj për piktorin, skulptorin, fotografin, muzikantin apo shkrimtarin. Përmes veprave të tyre, përvoja të veçanta njerëzore kthehen në histori që mund t’i kuptojë kushdo, pavarësisht gjuhës që flet.

“Arti nuk është vetëm një formë shprehjeje”, nënvizon shkrimi. Ai është edhe një mënyrë për ta parë, për ta kuptuar dhe për ta ndryshuar botën.

Një ditë për krijuesit

Dita është gjithashtu një rast për t’u ndalur te puna e artistëve, shpesh e heshtur dhe e gjatë, që qëndron pas çdo ekspozite, koncerti, libri apo shfaqjeje. Në vitin kur shënohen 145 vjet nga lindja e Picassos, trashëgimia e tij kujton se si vepra e një artisti mund të ndryshojë mënyrën se si e shohim botën.