Ujësjellësit nën peshën e energjisë: borxhi i klientëve jobuxhetorë ndaj OSHEE-së, 21.21 miliardë lekë

Fatura e energjisë elektrike mbetet një nga barrët më të rënda për shoqëritë e ujësjellës-kanalizimeve në Shqipëri. Sipas raportit të performancës së Entit Rregullator të Ujit (ERRU), energjia zë rreth një të katërtën e shpenzimeve të operimit dhe mirëmbajtjes në sektor.

Në vitin 2025, kostot e energjisë për ujësjellësit u rritën me 85.8 milionë lekë, ose 3.5% më shumë se në 2024. Pjesën më të madhe të rritjes e dhanë shoqëritë rajonale të Durrësit dhe Fierit. Për Durrësin, ERRU e lidh shtimin kryesisht me volumet më të mëdha të ujit të prodhuar e të shpërndarë, që kërkuan më shumë orë punë në stacionet e pompimit.

Gjysma e shoqërive nuk mbulon kostot

Problemi kryesor mbetet aftësia financiare. Nga 17 shoqëritë që operuan në 2025, vetëm tetë arritën të mbulonin me të ardhurat e faturuara shpenzimet e operimit dhe mirëmbajtjes. Nëntë të tjerat, ose 53%, mbetën me deficit.

Kjo pasqyrohet edhe te detyrimet ndaj OSHEE-së, të cilat sipas ERRU-së janë grumbulluar vit pas viti pavarësisht subvencioneve qeveritare. Të dhënat e ERE-s tregojnë se në fund të qershorit 2026 borxhi i klientëve jobuxhetorë, kategori ku bëjnë pjesë ujësjellësit, arriti në 21.21 miliardë lekë. Kjo shifër është 296 milionë lekë më e lartë se në fund të 2025-s dhe rreth 1.66 miliardë lekë më e lartë se në fund të 2024-s.

ERRU parashikon që energjia të mbetet faktor kyç për financat e sektorit për sa kohë një pjesë e shoqërive nuk gjenerojnë të ardhura të mjaftueshme për të mbuluar plotësisht shpenzimet.