IEKA për Paketën Fiskale: të shtyhet deri në korrik 2027 ulja e pragut të TVSH-së për bizneset e vogla

Instituti i Ekspertëve Kontabël të Autorizuar (IEKA) i është bashkuar të dielën reagimeve ndaj Paketës Fiskale 2027, duke kërkuar që disa nga ndryshimet të analizohen më tej para miratimit. Në një deklaratë zyrtare, të publikuar nga revista Monitor, IEKA thotë se mbështet drejtësinë fiskale, zgjerimin e bazës tatimore dhe formalizimin e ekonomisë, por paralajmëron për ndikimin në konsum, në konkurrueshmëri dhe në kostot e përmbushjes së detyrimeve.

Pragu i TVSH-së dhe norma 21%

Ulja e pragut të regjistrimit në TVSH nga 10 milionë në 5 milionë lekë, sipas IEKA-s, kërkon përshtatje organizative, kontabël dhe teknike për subjektet e prekura. Instituti rekomandon një periudhë tranzitore deri më 1 korrik 2027, të shoqëruar me asistencë teknike, deklarim tremujor dhe thjeshtime administrative.

Për rritjen e normës standarde nga 20% në 21%, IEKA kërkon një analizë të konsoliduar të efektit të kombinuar të masave të TVSH-së mbi kategoritë e ndryshme të familjeve. Ulja e TVSH-së për ushqimet bazë vlerësohet pozitivisht, por instituti thotë se përfitimi real varet nga reflektimi në çmime dhe kërkon monitorim periodik e transparent të tyre, si dhe rimbursim të TVSH-së me afate të qarta, për shembull 30 ditë.

Dividendi dhe profesionet e lira

Rritja e tatimit mbi dividendin nga 8% në 15% kërkon, sipas IEKA-s, vlerësim të plotë të ndikimit dhe mundësisht zbatim gradual. Instituti kërkon rregulla tranzitore për dividendët nga fitimet deri më 31 dhjetor 2026, për të shmangur efekte të ngjashme me prapaveprimin. Ai sugjeron edhe një analizë të posaçme për trajtimin fiskal të profesioneve të lira.

IEKA shprehet e gatshme të diskutojë rekomandimet me Ministrinë e Financave në një grup pune teknik. Më parë, kundër paketës janë shprehur AmCham, Shoqata e Investitorëve të Huaj (FIAA) dhe Aleanca e Profesionistëve të Lirë.