Studentët shqiptarë në Maqedoni të Veriut paralajmërojnë protesta të reja për provimet në shqip

Studentët shqiptarë në Maqedoninë e Veriut mund të dalin sërish në protesta në Shkup, pasi kërkesa e tyre që të gjitha provimet të mbahen në gjuhën shqipe ende nuk është plotësuar, paralajmëroi përfaqësuesi i studentëve Mevlan Ademi.

Sipas Ademit, provimi i jurisprudencës do të vazhdojë të mbahet në maqedonisht. Ai tha se propozimi aktual nuk garanton që provimi të zhvillohet 100% në shqip dhe as nuk vendos ndonjë afat, ndërsa për provimet e tjera nuk janë ndërmarrë hapa konkretë. Ai pretendoi gjithashtu se janë anashkaluar Kushtetuta dhe ligjet në fuqi.

Nga 50/50 në 84%

Ademi e vlerësoi si pozitiv ndryshimin e qasjes: nga qëndrimi se provimi mund të jetë vetëm në maqedonisht, te propozimi 50/50 i kryeministrit Mickoski dhe tani te një variant me 84% në shqip. Drejtimi është i duhuri, tha ai, por rruga mbetet e vështirë. Ai shtoi se deklaratat e mëparshme të zëvendëskryeministrave Fetai dhe Sali janë lënë mënjanë.

Ademi u bëri thirrje të gjithë përfaqësuesve shqiptarë të punojnë bashkërisht për një zgjidhje përfundimtare, duke theksuar se studentët “nuk kemi kohë për të humbur me lojëra politike”.

Më herët gjatë ditës, Ademi falënderoi ambasadorin e Shqipërisë në Shkup, Denion Meidani, për mbështetjen në çështjen e provimit të jurisprudencës në shqip, duke e cilësuar progresin si arritje, por jo zgjidhje të plotë.