“Rezistenca Studentore” pranon vaktin 4,500 denarë të Mickoskit, me kusht që të futet në ligj

Organizata “Rezistenca Studentore” në Maqedoninë e Veriut ka pranuar modelin e ri për vaktin e subvencionuar studentor, të propozuar nga Qeveria dhe Ministria e Arsimit, sipas të cilit shuma mujore rritet nga 3,500 në 4,500 denarë, njoftoi të dielën Portalb.mk.

Dy kushte

Pranimi vjen me dy kushte: zgjidhjet e dakorduara të përfshihen në Ligjin për vaktin e subvencionuar studentor dhe lista e kompanive e marketeve ku mund të përdoren paratë të publikohet paraprakisht, para se ligji të hyjë në fuqi. Sipas komunikatës, vendimi u mor pas konsultimeve të gjera me studentët brenda strukturave të organizatës.

Modeli parasheh një sistem të ri të quajtur “M Vakti Studentor”, si shërbim digjital në aplikacionin “M.Shërbime”, si dhe zbritje shtesë për studentët gjatë blerjes së ushqimit. Zbritjet do të vlejnë deri në fund të muajit, edhe nëse studenti e ka shpenzuar të gjithë shumën prej 4,500 denarësh.

Pas takimit me Mickoskin

Propozimi u prezantua të mërkurën në takimin e kryeministrit Hristijan Mickoski dhe ministres së Arsimit me përfaqësuesit e parlamenteve studentore të të gjitha universiteteve. Të premten, Mickoski tha se priste përgjigjen e studentëve dhe se, sipas tij, edhe ata ishin pajtuar në takim që modeli i ri është më i mirë se ai aktual.

Me pranimin e kushtëzuar, topi kalon tani te qeveria dhe Kuvendi, të cilët duhet të vendosin nëse do t’i përfshijnë kërkesat e studentëve në ndryshimet ligjore. Portalb nuk raportoi ndonjë afat për miratimin e ligjit.