Strehimi social 2027: 4,000 kredi për banesa, gjysma me 0% interes, dhe 3,000 qira të subvencionuara

Programi i strehimit social për vitin 2027 parashikon 4,000 kredi për blerjen e banesës dhe 3,000 mundësi për qira të subvencionuara, njoftoi të hënën Agjencia e Medias dhe Informimit. Ndryshimet në ligjin për strehimin social synojnë ta zgjerojnë mbështetjen përtej familjeve në nevojë, te të rinjtë, studentët, çiftet e porsamartuara, profesionistët dhe qytetarët që rikthehen nga emigracioni.

Dy lloje kredish

Nga 4,000 kreditë, 2,000 do të jepen me 0% interes për apartamente me vlerë deri në 60,000 euro, ndërsa 2,000 të tjerat me interes 3%. Për skemën e qirasë, shteti do të mbulojë 50% të qirasë, sipas kritereve që përcakton programi.

Sipas të dhënave të publikuara, nga viti 2018 deri më sot rreth 31,000 familje kanë marrë mbështetje për strehim. Prej tyre, 14,512 familje kanë përfituar subvencion qiraje, 7,290 kredi të buta dhe 6,078 ndihmë për përmirësimin e kushteve të banimit.

1,500 fitues në Tiranë

Po të hënën, Bashkia e Tiranës shpalli rreth 1,500 fituesit e radhës të programit social “Për subvencionimin e interesave të kredive”, që ndihmon familjet me të ardhura të ulëta të blejnë apartament në kryeqytet. Pjesa e subvencionuar e interesit paguhet nga buxheti i shtetit, ndërsa kredia shlyhet me interes 3%.

Lista e fituesve u dërgua për miratim në mbledhjen e tetorit të Këshillit Bashkiak. Pas miratimit, përfituesit duhet t'u drejtohen bankave të nivelit të dytë që kanë marrëveshje me bashkinë për të përfunduar procedurat. Shuma e kredisë për secilin aplikant varet nga numri i anëtarëve të familjes dhe nga kriteret e programit, i cili ishte ndër nismat e para të kryetarit Erion Veliaj.