Shqipëria nënshkruan marrëveshjen për t'iu bashkuar Forcës Ndërkombëtare të Stabilizimit në Gaza

Shqipëria finalizoi të premten pjesëmarrjen e saj zyrtare në Forcën Ndërkombëtare të Stabilizimit (ISF) në Gaza. Marrëveshja me Bordin e Paqes u nënshkrua në selinë e Shtabit të Përgjithshëm të Forcave të Armatosura në Tiranë nga shefi i Shtabit, gjeneral-lejtnant Arben Kingji, dhe komandanti i ISF-së, gjeneral-major Jasper Jeffers.

Në ceremoni ishin të pranishëm ministri i Mbrojtjes, Ermal Nufi, dhe ambasadori i Shteteve të Bashkuara në Tiranë, Eric Wendt.

Nufi: Angazhim për stabilitet afatgjatë

Ministri Nufi tha se Shqipëria, si anëtare themeluese e Bordit të Paqes, rikonfirmon angazhimin e saj në përpjekjet ndërkombëtare për vendosjen e paqes, garantimin e sigurisë dhe krijimin e kushteve për stabilitet të qëndrueshëm në Gaza.

Në deklaratat e bëra publike nuk u dha numri i ushtarakëve shqiptarë që do të marrin pjesë në mision, kostoja apo data e dislokimit. Më herët gjatë vitit, gjenerali Kingji kishte thënë se kontingjenti i parë shqiptar do të ishte pjesë e shtabit të forcës stabilizuese, ndërsa Ministria e Mbrojtjes kishte dërguar një ekip për të vlerësuar situatën në terren.

Ndër vendet e para

Shqipëria ishte përmendur që në fillim të vitit ndër shtetet e para që u zotuan të kontribuonin në forcën e udhëhequr nga gjenerali amerikan Jeffers, së bashku me Kosovën, Indonezinë, Marokun dhe Kazakistanin. Forca është pjesë e planit për stabilizimin e Rripit të Gazës. Po të premten, ministri Nufi priti në Tiranë atasheun e ri ushtarak të Turqisë, me të cilin diskutuan zgjerimin e bashkëpunimit në industrinë e mbrojtjes.