Serbia në heshtje zgjedhore: rreth 150 mijë në tubimin e studentëve në “Slavija”, gara mbetet e pasigurt

Serbia hyri në heshtjen zgjedhore para zgjedhjeve të parakohshme parlamentare të së dielës, 25 tetor, në një atmosferë tensionesh të larta politike. Sipas Deutsche Welle, të përcjellë nga Portalb.mk, dhjetëra mijëra qytetarë u mblodhën në sheshin “Slavija” në Beograd për tubimin përmbyllës të Listës Studentore. Arkivi i Tubimeve Publike vlerësoi rreth 150,000 pjesëmarrës.

Lëvizja studentore, pas dy vitesh protestash, përballet drejtpërdrejt me Partinë Përparimtare Serbe (SNS). Edhe tubimi i mëparshëm i SNS-së në Novi Beograd kaloi i qetë.

Garë pa sondazhe të besueshme

Në Serbi anketat publikohen rrallë dhe besimi te to është i kufizuar. Burime të DW-së, të njohura me hulumtimet, e vlerësojnë garën të pasigurt dhe në qarqet politike flitet për mundësinë e negociatave të ndërlikuara pas votimit. Politologu Ivan Stanojeviq tha se studentët kanë zgjuar një pjesë të qytetarëve nga apatia dhe se pjesëmarrja do të jetë faktor kyç.

Shqetësime ka edhe për rregullsinë e procesit, me akuza të kahershme për presion ndaj votuesve, blerje votash dhe evidenca paralele. Lista Studentore ka paralajmëruar ekipe të lëvizshme që do ta ndjekin situatën pranë vendvotimeve.

Fushatë mbi korrupsionin

Studentët e përqendruan fushatën te lufta kundër korrupsionit, funksionimi i institucioneve dhe sundimi i ligjit, ndërsa temat e BE-së, Rusisë, Kosovës dhe Srebrenicës mbetën në plan të dytë. Pasigurinë e shtuan deklaratat e Aleksandar Vuçiqit, i cili në televizionin “Informer” tha: “Dua që po atë mbrëmje të them gjithçka më të keqe për ta dhe po atë mbrëmje të nis luftën kundër tyre!”