Raporti i DASH-it për trafikimin: Kosova mbetet në Nivelin 2, kritika për mbrojtjen e viktimave

Departamenti amerikan i Shtetit ka publikuar raportin vjetor për trafikimin e qenieve njerëzore, i cili e mban Kosovën sërish në Nivelin 2. Kjo do të thotë se qeveria nuk i plotëson plotësisht standardet minimale për eliminimin e trafikimit, por po bën përpjekje të konsiderueshme në këtë drejtim.

Sipas raportit, që mbulon vitin 2025, autoritetet dënuan më shumë trafikantë, dhanë më shumë dënime me burg dhe shtuan fondet për ndihmën ndaj viktimave dhe parandalimin. Qeveria vlerësoi edhe Planin Kombëtar të Veprimit 2024–2025 dhe konstatoi se gati gjysma e objektivave ishin përmbushur.

Ku mbetet Kosova prapa

Megjithatë, numri i të dyshuarve të ndjekur penalisht ra, ndërsa shumica e dënimeve me burg ishin nën minimumin e parashikuar nga ligji. Raporti thekson se autoritetet nuk i hetuan si trafikim të gjitha rastet e fëmijëve të detyruar të lypin, dhe se procedurat e identifikimit mbeten të pamjaftueshme, sidomos për fëmijët.

Qeveria nuk ofroi riintegrim apo ndihmë afatgjatë, veçanërisht për fëmijët dhe viktimat që kanë nevojë për mbështetje psikosociale. Sipas raportit, trafikantët i joshin gratë dhe vajzat me premtime të rreme për martesë ose punë dhe i shfrytëzojnë seksualisht në shtëpi private, klube nate dhe sallone masazhi, ndërsa kosovarët trafikohen edhe nëpër Evropë për shfrytëzim seksual dhe punë të detyruar.

Kodi Penal i Kosovës, në nenin 165, parashikon 5 deri në 12 vjet burg për trafikimin e të rriturve dhe 5 deri në 15 vjet kur viktimat janë fëmijë. Raporti i vlerëson këto dënime si mjaftueshëm të ashpra, por vëren se gjykatat shpesh shqiptojnë dënime nën këtë minimum.