Rama publikon pamje nga oborri i PD-së: “Studentët” në Universitetin e Dhunës

Kryeministri Edi Rama publikoi të shtunën pasdite pamje me protestues të mbledhur në oborrin e selisë së Partisë Demokratike, duke i shoqëruar me mbishkrimin “‘Studentët’ në Universitetin e Dhunës. E shtunë, 24 tetor, ora 15:30”. Sipas raportimeve, ora e filmimit përkon me nisjen e sulmeve të para në bulevardin “Dëshmorët e Kombit”.

Me thonjëzat te fjala “studentët”, kreu i qeverisë vuri në pikëpyetje karakterin studentor të protestës së ditës, të cilën PD e kishte shpallur kombëtare në mbështetje të studentëve.

“Mëma e dhunës”

Më herët gjatë ditës, Rama e kishte quajtur Partinë Demokratike “mëma e dhunës”, pasi mbështetës të opozitës, pas një tubimi simbolik para Kryeministrisë, dogjën shiltet dhe jastëkët e vendosur rreth tryezës së dialogut. Sipas Koha Jonë, kjo ndodhi rreth mesditës. Në një postim tjetër, Rama pretendoi se PD i dogji dhe i shkatërroi sendet me të maskuar, krah për krah me “ANTIFA” dhe persona të tjerë të dhunshëm.

Tryeza e dialogut para Kryeministrisë ishte vendosur nga kryeministri si ftesë për bisedë me studentët dhe pedagogët, pasi në ditët e mëparshme karriget e dialogut ishin djegur dhe rrëzuar disa herë.

Dita e 12-të e protestave

Protesta e së shtunës nisi rreth orës 14:00 para Ministrisë së Arsimit dhe u përshkallëzua shpejt. Protestuesit marshuan përgjatë bulevardit “Dëshmorët e Kombit” drejt sheshit Skënderbej, ku u regjistruan përplasje dhe hedhje të vazhdueshme gurësh, molotovësh e fishekzjarresh drejt policisë, e cila u përgjigj me gaz lotsjellës dhe autobotë uji. Opozita e quajti tubimin protestë kombëtare, ndërsa kryetari i PD-së, Sali Berisha, akuzoi në mbrëmje policinë për dhunë ndaj protestuesve.