Rama: Po punojmë për ndalimin e rrjeteve sociale për fëmijët nën 16 vjeç

Kryeministri Edi Rama njoftoi të martën se qeveria po përgatit masa për të kufizuar përdorimin e rrjeteve sociale nga fëmijët nën moshën 16 vjeç. Deklarata u bë në Ministrinë e Arsimit, gjatë një takimi me drejtuesit e gjimnazeve të kryeqytetit, pas ditësh me protesta në Tiranë ku janë përfshirë edhe të mitur.

Rama nuk dha detaje se si do të zbatohej një ndalim i tillë në praktikë. Ai tha gjithashtu se qeveria po shqyrton mundësinë e uljes së moshës për dënimin penal, duke e paraqitur si një rrugë që po e ndjekin edhe disa vende evropiane. Sipas tij, kjo çështje është ende në fazë studimi.

Paketë masash administrative

Kryeministri përmendi një paketë që nuk do të kufizohet vetëm te masat penale, por do të përfshijë edhe masa administrative. Ai theksoi se kushdo që dëmton pronën publike ose private do të detyrohet të paguajë dëmin e shkaktuar.

Drejtorëve të shkollave Rama u kërkoi të mbajnë një ditar të hollësishëm të ngjarjeve, me qëllim që të identifikohen nxënësit që mund të kenë nevojë për mbështetje. Ai pretendoi se gjatë protestave janë lënduar rreth 200 policë dhe rreth 80 protestues, shifra këto që nuk janë verifikuar në mënyrë të pavarur, dhe mohoi që policia të ketë përdorur forcë joproporcionale.

Kreu i qeverisë tha po ashtu se gjykatat i kanë gjetur të ligjshme arrestimet e kryera nga policia, por shprehu mendimin se ato kanë qenë shumë të buta me rastet e dhunës.