Protestat në Tiranë: 9 të arrestuar, mes tyre një gjerman, 20 në kërkim; në pranga shitësi i fishekzjarreve

Policia e Shtetit njoftoi të hënën në mëngjes arrestimin e nëntë personave pas përplasjeve gjatë tubimeve të fundjavës në Tiranë. Sipas policisë, ata dyshohen se kundërshtuan dhe goditën efektivët me sende të forta dhe lëndë piroteknike dhe dëmtuan godina të institucioneve shtetërore.

Të arrestuarit janë me inicialet A. K., 27 vjeç, P. L., 45 vjeç, E. B., 21 vjeç, Sh. M., 19 vjeç, O. C., 19 vjeç, Z. M., 25 vjeç, S. H., 20 vjeç, K. M., 20 vjeç, si dhe M. L., 23 vjeç, shtetas gjerman. Dy persona të tjerë u proceduan penalisht, ndërsa 20 u shpallën në kërkim.

Shkeli arrestin në shtëpi

Në pranga ra edhe E. D., 20 vjeç, i cili sipas policisë kishte shkelur masën “arrest në shtëpi” të caktuar për vjedhje dhe dyshohet se mori pjesë në veprime të kundërligjshme gjatë tubimit të 24 tetorit. Në banesën e K. M. u gjet një sasi e dyshuar si kanabis, e cila u sekuestrua si provë.

Operacioni “Fireworks 2”

Pasdite policia njoftoi se zbuloi një tjetër banesë me lëndë piroteknike të kontrabanduara. Në operacionin e koduar “Fireworks 2”, specialistët e krimeve ekonomiko-financiare arrestuan në flagrancë D. B., 32 vjeç, në banesën e të cilit në rrugën “Zela” u gjetën 47 pako me fishekzjarre. Ai nuk kishte as licencë shitjeje, as dokumente për blerjen e tyre.

Hetimet dyshojnë se 32-vjeçari ua shiti fishekzjarret personave të maskuar që morën pjesë në tubimin e së shtunës, për t’i përdorur në veprime të dhunshme. Policia tha se po punon për të identifikuar persona të tjerë të përfshirë, ndërsa materialet iu kaluan prokurorisë. Tubimi i së hënës, dita e 14-të e protestës, kaloi pa incidente.