Protestat mbyllin 33 degë bankare në Tiranë e Durrës; ekonomisti Sefa: dëmet deri në 10 milionë euro

Disa banka kanë kufizuar shërbimin fizik në Tiranë dhe Durrës për shkak të protestave studentore që vijojnë në kryeqytet. Sipas njoftimeve publike të bankave, të përmbledhura nga ATSH të hënën në mbrëmje, 33 degë janë mbyllur përkohësisht, ndërsa 27 të tjera punojnë me orar të shkurtuar.

Banka Kombëtare Tregtare mbylli 12 degë në kryeqytet dhe i orientoi klientët drejt shërbimeve elektronike. Raiffeisen Bank mbylli pesë degë në Tiranë, OTP Bank dy, ndërsa tetë të tjera i kaloi në orar të reduktuar. ABI Bank njoftoi se tetë degë punojnë deri në mesditë, Credins shkurtoi orarin në gjashtë degë dhe mbylli një, Union Bank mbylli tri degë, ndërsa Intesa Sanpaolo vendosi kufizime në disa pika, me shërbim deri në orën 13:00. Fibank pezulloi shërbimin në degët pranë Kullave Binjake dhe Fakultetit të Shkencave, ndërsa ProCredit njoftoi se punon normalisht.

Union Bank njoftoi gjithashtu se tërheqjet e parave nga bankomatet në gjithë vendin, përfshirë ato të bankave të tjera, do të bëhen pa tarifë. Bankat theksojnë se mbylljet janë masa sigurie dhe se veprimtaria nuk është ndërprerë, pasi pagesat dhe transfertat mund të kryhen përmes aplikacioneve, internet banking-ut dhe bankomateve.

Kush e paguan faturën

Ekonomisti Ergis Sefa, në emisionin “7 pa 5” të Vizion Plus, vlerësoi se dëmet për bizneset, përfshirë bankat, mund të arrijnë deri në 10 milionë euro për javën e protestave. Sipas tij, kjo shifër nuk përfshin vetëm dëmet fizike, por edhe xhiron e humbur, taksat dhe pagat që bizneset vijojnë t’i paguajnë gjatë mbylljes.

Sefa paralajmëroi se rreziku më i madh është paniku, jo humbja e kursimeve, pasi paratë në sistemin digjital nuk preken. Ai pretendoi se vetëm rreth 4% e bizneseve në Shqipëri janë të siguruara dhe se, në fund, kostot do t’i bartin qytetarët, përfshirë përmes tarifave më të larta bankare në të ardhmen.