Protesta për Arlinda Zekajn në Prishtinë: “Edhe sa?”, protestuesit kërkojnë shkarkimin e Gërvallës dhe Sveçlës

Dhjetëra protestues nga e gjithë Kosova u mblodhën të mërkurën në Prishtinë për të kërkuar drejtësi pas vrasjes së Arlinda Zekajt, gruas 49-vjeçare që u vra me sëpatë të dielën mbrëma në Vitomiricë të Pejës. Protesta nisi në sheshin “Zahir Pajaziti” dhe kaloi para Ministrisë së Drejtësisë, Këshillit Prokurorial të Kosovës dhe stacionit qendror të Policisë, para se të përmbyllej te ndërtesa e Qeverisë.

Ngjyrë e kuqe dhe parulla

Para institucioneve u hodhën mjete piroteknike dhe tymuese, ndërsa ndërtesa e Policisë u spërkat me ngjyrë të kuqe. Në dyert e Qeverisë u vizatua një sëpatë e kuqe dhe u shkrua një fjali nga letra e Arlinda Zekajt: “Tani po kuptoj pse ka kaq shumë vrasje”. “Shteti i ka duart me gjak” dhe “Jepni dorëheqje” ishin ndër thirrjet e protestuesve.

Familjarë të viktimës, të pranishëm në protestë, u bënë thirrje pjesëmarrësve të mos përshkallëzojnë në dhunë. “Mos prishni, këto janë t’tonat. Nuk duam dhunë na”, u dëgjuan të thoshin ata.

Kërkesat e aktivisteve

Aktivistja Liridona Sijarina nga Kolektivi Feminist tha se brenda më pak se dy muajsh janë vrarë katër gra në Kosovë dhe kërkoi ndjekje penale për kryeprokurorë, zyrtarë të Qendrës për Punë Sociale dhe gjyqtarë që, sipas saj, mbajnë përgjegjësi për rastin. Ajo kërkoi shkarkimin e ministres Donika Gërvalla dhe të ministrit të Punëve të Brendshme, Xhelal Sveçla. “Protestat e tona nuk kanë me u ndalë natë e ditë, kanë me u përshkallzu”, paralajmëroi Sijarina.

Organizatorët njoftuan se protesta do të vazhdojë të enjten në Prishtinë, duke nisur nga ora 16:00, me kërkesën për drejtësi për të gjitha gratë e vrara.