Protesta e së shtunës: 6 të arrestuar, për herë të parë akuzë për tentativë vrasjeje të punonjësit të policisë

Policia e Tiranës arrestoi gjashtë persona për aktet e dhunës gjatë protestës së së shtunës, 31 tetor, ndërsa tre të tjerë u proceduan penalisht dhe dy u shpallën në kërkim. Për herë të parë që nga nisja e protestave, sipas Top Channel, të arrestuarit akuzohen edhe për “vrasje e punonjësit të policisë”, e mbetur në tentativë.

Sipas njoftimit të policisë, protestuesit kundërshtuan dhe goditën efektivët me sende të forta, materiale piroteknike, bomba molotov, sfera dhe vida metalike. Ata bllokuan edhe qarkullimin e mjeteve dhe i vunë zjarrin një koshi mbeturinash.

Kush janë të arrestuarit

Në pranga përfunduan A. Sh., 26 vjeç, L. K., 18 vjeç, F. Ç., 38 vjeç, shtetasi i huaj K. R., 35 vjeç, si dhe dy të mitur, emrat dhe moshat e të cilëve nuk u bënë publike. Gjatë kontrollit, te L. K. dhe A. Sh. u gjetën dhe u sekuestruan bomba molotov.

Materialet u referuan në prokurori për tentativë vrasjeje të punonjësit të policisë, organizim dhe pjesëmarrje në grumbullime e manifestime të paligjshme, prishje të qetësisë publike, kundërshtim të punonjësit të policisë së rendit, shkelje të rregullave për lëndët plasëse e djegëse, bllokim të qarkullimit, shkatërrim prone me zjarr, si dhe prodhim e mbajtje pa leje të armëve dhe municionit luftarak.

Hetimet vijojnë

Specialistët e Hetimit të Krimeve, në bashkëpunim me prokurorinë, thanë se vijojnë veprimet për dokumentimin e plotë të veprimeve të kundërligjshme, identifikimin e personave të tjerë të përfshirë dhe vënien e tyre para përgjegjësisë ligjore. Protesta e së shtunës u zhvillua para Ministrisë së Arsimit dhe Kryeministrisë.