Protesta e 13-të mbyllet me molotovë në sheshin “Skënderbej”: thyhen xhamat e Kuvendit, goditen bizneset

Dita e 13-të e protestës së studentëve në Tiranë u mbyll të dielën në mbrëmje me përplasje me policinë dhe molotovë në sheshin “Skënderbej”. Protesta, ku sipas ATSH-së u bashkuan qytetarë dhe të mitur të maskuar, zgjati rreth gjashtë orë dhe lëvizi nga Ministria e Arsimit drejt Kryeministrisë e më pas në sheshin qendror. Ajo nisi pak orë pasi qeveria shpalli paketën e masave kundër dhunës urbane.

Molotovë, gozhdë dhe xhama të thyer

Para Kryeministrisë, persona të maskuar thyen me shufra hekuri ndriçuesit e rrugës dhe hodhën gurë e kapsolla drejt godinës dhe efektivëve. Pranë sheshit “Skënderbej” protestuesit qëlluan me molotovë forcat e policisë, i vunë flakën një peme në një lulishte dhe vendosën gozhdë për t'u çarë gomat makinave të policisë që mund të hynin në shesh.

Gjatë protestës u sulmua edhe godina e Kryesisë së Kuvendit, ku u thyen xhamat, ndërsa u dëmtuan disa biznese në katin përdhes të “Kullave Binjake”, përfshirë një bankë të nivelit të dytë. Pas thirrjeve të përsëritura për t'u distancuar nga dhuna, policia e shpërndau turmën me autobotë uji dhe gaz lotsjellës.

Katër të lënduar në spital

Ministria e Shëndetësisë dhe Mirëqenies Sociale njoftoi se në Spitalin Universitar të Traumës u paraqitën gjithsej tre të lënduar nga protesta. Deri në orën 19:00, një protestues ishte i shtruar, ndërsa një protestues tjetër dhe një efektiv policie morën ndihmën e nevojshme dhe u larguan. Një efektiv tjetër u paraqit në Qendrën Spitalore Universitare “Nënë Tereza”, ku po i nënshtrohej ekzaminimeve.

Deri në mbyllje të ditës policia nuk kishte bërë publik numrin e të shoqëruarve apo të arrestuarve nga kjo protestë. Protestat e studentëve, që nisën më 13 tetor, kërkojnë dorëheqjen e qeverisë së Edi Ramës.