Prokuroria e Tiranës heton policinë për plagosjen në sy të Erjon Vishkullit, letërporosi drejt Italisë

Prokuroria e Tiranës ka regjistruar me nismën e saj një procedim penal për dëmtimin në sy të 28-vjeçarit Erjon Vishkulli gjatë protestës së 24 tetorit, si dhe për dyshimet se punonjës të Policisë së Shtetit përdorën forcë joproporcionale.

Sipas njoftimit të prokurorisë, hetuesit kanë administruar pamjet filmike të vëna në dispozicion nga Banka e Shqipërisë dhe kartelën mjekësore të të riut në Spitalin Universitar të Traumës. Veprimet po kryhen në bashkëpunim me Agjencinë e Mbikëqyrjes Policore. Vishkulli ndodhet në Itali për kurim, dhe prokuroria tha se po përcakton mënyrën e komunikimit me autoritetet italiane për t’u dërguar drejtpërdrejt një letërporosi.

Plumb gome apo tjetër material?

Sipas Top Channel, hetimet zhvillohen nga dy prokurorë për “shpërdorim detyre” dhe “kryerje të veprimeve arbitrare”, ku dyshohen oficerë policie. Letërporosia synon të sigurojë materialin që do të nxirret nga syri i 28-vjeçarit, për të përcaktuar nëse bëhet fjalë për plumb gome apo diçka tjetër. Prokurorët kanë kërkuar, sipas televizionit, edhe listën e oficerëve të FNSH-së të vendosur atë ditë pranë Bankës së Shqipërisë, selisë së PS-së dhe Ministrisë së Bujqësisë.

Rreth 20 kartela mjekësore

Në të njëjtin procedim po hetohen edhe dëmtimet e disa protestuesve të tjerë. Deri tani janë administruar rreth 20 kartela mjekësore. Top Channel raporton se nën hetim janë edhe thyerja e këmbës së Ledion Ballës, rrahja e disa protestuesve dhe rrëzimi përtokë i një të riu nga një oficer me skafandër, ndërsa është kërkuar rregullorja e policisë për ndërhyrjet në protesta. Prokuroria tha se verifikimet vijojnë.