Prokurorët e RMV-së i kërkojnë Kushtetueses vendim urgjent për uljen e pagave të tyre

Prokurorët në Maqedoninë e Veriut po i bëjnë presion Gjykatës Kushtetuese të vendosë për uljen e pagave të tyre. Këshilli i Prokurorëve Publikë, Prokuroria Publike dhe Shoqata e Prokurorëve Publikë i kërkuan Gjykatës, me një deklaratë të përbashkët, që t’i fusë urgjentisht në rend dite iniciativat e tyre.

Iniciativat, të dorëzuara tetë muaj më parë, kundërshtojnë ndryshimet në ligjet për pagat e prokurorëve publikë dhe të anëtarëve të Këshillit të Prokurorëve, të cilat ulën koeficientët dhe rrjedhimisht pagat. Kryesia e Shoqatës shprehu shqetësim serioz për mosveprimin e Gjykatës, duke thënë se kjo vë në pikëpyetje pavarësinë e Prokurorisë dhe krijon hendek mes funksionit gjyqësor dhe atij prokurorial.

Frika nga largimet

Prokurorët paralajmërojnë se ulja e pagave mund të shtyjë një numër të konsiderueshëm kolegësh të largohen. Sipas tyre, pagat mbeten më të ulëtat në rajon, ndërsa mungesa e stafit, buxhetit dhe kushteve bazë të punës është kronike. Ata presin që raporti i ardhshëm i Komisionit Evropian për vendin ta shënojë këtë si regres të konsiderueshëm të pavarësisë së Prokurorisë.

Çështja nuk është e re. Prokurorët reaguan edhe në mesin e korrikut, kur kryetari i Gjykatës Kushtetuese, Darko Kostadinovski, sqaroi se procedura kishte nisur, por qeveria kishte ulur sërish koeficientët me ndryshimet e shkurtit 2026. Sipas tij, propozimi i gjyqtarit raportues nuk mori shumicën e nevojshme, pasi votimi përfundoi 4 me 4 në një gjykatë që funksionon me një anëtar më pak.

Ulje pagash për funksionarët, përfshirë gjyqtarët dhe prokurorët, ishin miratuar edhe në vitin 2024. Ndryshimet e fundit kaluan në Kuvend në fund të shkurtit, pavarësisht kërkesës së Shoqatës për tërheqjen e tyre.