PPE për protestat në Shqipëri: Dhuna s'ka vend në demokraci, hetim i pavarur për forcën e tepruar

Partia Popullore Evropiane (PPE), grupimi kryesor i qendrës së djathtë në Evropë, reagoi të premten për protestat në Shqipëri, duke theksuar në një postim në X se e drejta për protestë paqësore duhet respektuar plotësisht.

PPE kërkoi që çdo pretendim për përdorim të tepruar, të paligjshëm apo joproporcional të forcës të hetohet menjëherë, plotësisht dhe në mënyrë të pavarur, duke shtuar se organet e rendit duhet të veprojnë gjithmonë në mënyrë proporcionale.

Dënim i dhunës nga të gjitha palët

Në të njëjtën kohë, partia evropiane deklaroi se dhuna e paligjshme dhe sulmet nga çdo palë, veçanërisht ndaj pronës dhe integritetit personal, nuk kanë vend në një demokraci. Ajo kërkoi që tensionet të zgjidhen përmes dialogut, de-përshkallëzimit dhe angazhimit demokratik, dhe që zëri i të rinjve të dëgjohet. Reagimi vjen pas thirrjeve të ngjashme këtë javë nga shefi i OKB-së për të drejtat e njeriut, Volker Türk, dhe nga kongresistët amerikanë Alexandria Ocasio-Cortez e Ritchie Torres, që dënuan dhunën dhe kërkuan ulje të tensioneve.

PD-ja e Sali Berishës është anëtare e PPE-së. Kryeministri Edi Rama e përsëriti të premten ftesën për dialog, duke thënë se është i gatshëm të takohet në çdo vend dhe në çdo orë, por njëkohësisht paralajmëroi se dhuna do të ndëshkohet penalisht.

Eurodeputetja: Pretendim i rremë

Ndërkohë, eurodeputetja Anna Strolenberg reagoi në rrjetet sociale ndaj paralajmërimit se protestuesve të dhunshëm do t'u ndalohet hyrja në BE. "Ky pretendim është i rremë!", shkroi ajo, duke u bërë thirrje shqiptarëve të mos dekurajohen nga ushtrimi i së drejtës për tubim paqësor dhe të qëndrojnë të sigurt.