Policia pas protestës së 24 tetorit: 23 të arrestuar, 13 të proceduar dhe 30 të shpallur në kërkim

Policia e Shtetit njoftoi të dielën në mëngjes bilancin e protestës së 24 tetorit në Tiranë: 23 persona janë arrestuar, 13 të tjerë janë proceduar penalisht dhe 30 janë shpallur në kërkim. Sipas policisë, ata kundërshtuan dhe goditën me sende të forta e lëndë piroteknike punonjësit e rendit dhe dëmtuan godina të institucioneve shtetërore në disa zona të kryeqytetit.

Të arrestuarit, nga 18 deri në 54 vjeç

Në listën e publikuar me inicialet, të arrestuarit janë të moshave nga 18 deri në 54 vjeç; më i riu është 18-vjeçari B.O., ndërsa më i moshuari 54-vjeçari J.B. Shumica e tyre janë nën 40 vjeç, mes tyre edhe dy të rinj 19 dhe 20 vjeç. Policia nuk dha emrat e 13 të proceduarve dhe të 30 personave të shpallur në kërkim. Materialet iu dërguan Prokurorisë për veprime të mëtejshme.

Sipas njoftimit, protestuesit përdorën kundër policisë gurë, vida dhe sfera metalike, shkopinj druri e metalikë, lëndë piroteknike, molotovë dhe bombola gazi të pajisura me detonatorë. Në një njoftim tjetër për mediat, policia bëri të ditur se gjatë tubimit u plagosën pesë punonjës policie, të cilët morën ndihmë mjekësore.

Hetim për 28-vjeçarin e plagosur në sy

Policia njoftoi gjithashtu se për dëmtimin në sy të një 28-vjeçari gjatë protestës po heton Drejtoria e Standardeve Profesionale. Efektivi A.K. i Forcës Speciale “Shqiponja” është pezulluar nga detyra në pritje të hetimit administrativ, ndërsa hetime kanë nisur edhe Agjencia e Mbikëqyrjes së Policisë dhe Prokuroria.

Protesta e 24 tetorit ishte dita e 12-të e protestave të studentëve, të cilat nisën më 13 tetor dhe kërkojnë dorëheqjen e qeverisë.