Përmbytje në jug të Francës: një i vdekur pranë Marsejës, një i zhdukur në Korsikë

Një valë e re moti të keq goditi juglindjen e Francës, duke shkaktuar përmbytje, makina të marra nga uji dhe shtëpi të zhytura në ujë. Shirat e rrëmbyeshëm nisën të hënën dhe u zbutën rreth mesditës së së martës, duke lëvizur nga rajoni Occitanie drejt Provence-Alpes-Côte d’Azur.

Një 75-vjeçar u gjet i pajetë në Istres, në departamentin Bouches-du-Rhône, pasi ishte marrë nga rrjedha e ujit në Saint-Mitre-les-Remparts. Për kërkimin e tij ishte angazhuar edhe një helikopter. Sipas raportimeve, në Istres lëvizjet e dheut prekën rreth 200 shtëpi, ndërsa në Saint-Chamas u regjistruan mbi 220 milimetra shi brenda 24 orëve.

I zhdukur në Korsikë

Në Ghisonaccia të Korsikës së Epërme, prefektura njoftoi se një person është i zhdukur. Dy persona ndodheshin në një fuoristradë që u mor nga lumi Fium’orbu; njëri arriti të dilte nga dritarja, ndërsa ekipet e shpëtimit po kërkojnë të dytin. Në veri të Solenzarës ranë afër 400 milimetra shi që nga fillimi i episodit.

Evakuime dhe trafik i bllokuar

Në Istres, rreth 50 kilometra në perëndim të Marsejës, një pjesë e banorëve u evakuuan dhe u strehuan në një sallë sportive. Në Lunel u pritën rreth 15 persona në një qendër komunale, ndërsa në Nîmes autostrada A9 u mbyll për disa orë dhe treni vazhdonte të kishte vonesa. Në Marsejë, disa pjesë të autostradave u përmbytën, daljet u mbyllën dhe shërbimi i tramvajit u pezullua të martën në mëngjes.

Episodi lidhet me sistemin e presionit të ulët të ftohtë të quajtur “Adam”, i cili ka sjellë më parë reshje të rrëmbyeshme dhe përmbytje në Spanjë, ku janë raportuar të paktën katër viktima.