Ocasio-Cortez dhe Ritchie Torres dënojnë dhunën ndaj protestuesve në Shqipëri: Ulni tensionet

Protestat në Shqipëri kanë tërhequr vëmendjen e Kongresit amerikan. Dy anëtarë demokratë të Dhomës së Përfaqësuesve, Alexandria Ocasio-Cortez dhe Ritchie Torres, të dy nga Nju Jorku, reaguan publikisht ndaj përdorimit të forcës nga policia gjatë protestave të studentëve në Tiranë.

Ocasio-Cortez: Mesazhe nga komuniteti shqiptar

Ocasio-Cortez i bëri thirrje qeverisë shqiptare të ulë tensionet dhe të respektojë lirinë e shprehjes, duke i kërkuar asaj të ndalë represionin e dhunshëm ndaj protestuesve. Sipas deklaratës së përcjellë nga mediat shqiptare, ajo tha se gjatë javës së fundit kishte marrë mesazhe nga pjesëtarë të komunitetit shqiptar në SHBA, të shqetësuar për sigurinë e të afërmve të tyre në Shqipëri.

Torres: Veprimet e policisë, alarmante

Ritchie Torres, gjithashtu demokrat, u shpreh “thellësisht i shqetësuar” nga shpërthimi i dhunës ndaj protestuesve. Ai i quajti veprimet e policisë shqiptare të papranueshme, duke kërkuar që ato të marrin fund. Torres theksoi se shqiptarët kanë të drejtë të protestojnë në mënyrë paqësore dhe se policia duhet ta respektojë këtë të drejtë teksa zbaton ligjin, ndërsa bëri thirrje për qetësimin e situatës.

Reagimet vijnë pas një deklarate të mërkurën nga një senator amerikan, i cili kërkoi mbrojtjen e qytetarëve nga dhuna policore dhe luftën ndaj korrupsionit, si dhe pas thirrjes së OSBE-së që dënoi sërish dhunën në protesta e sulmet ndaj gazetarëve. Më herët gjatë javës, Komisioneri i Lartë i OKB-së për të Drejtat e Njeriut, Volker Türk, kishte kërkuar hetim të pavarur.

Kryeministri Rama ka mbrojtur ndërhyrjet e policisë, duke theksuar numrin e lartë të efektivëve të lënduar dhe duke akuzuar një pjesë të protestuesve për dhunë të organizuar.