Kompany rrëzohet në stërvitje dhe dërgohet me ambulancë në spital, Bayerni: Shëndeti i tij, prioriteti ynë

Trajneri i Bayern Munichut, Vincent Kompany, u dërgua të premten me ambulancë në spital pasi u rrëzua në qendrën stërvitore të klubit në Säbener Strasse, ndërsa po ndiqte seancën e ekipit rezervë. Lajmin e dhanë të parët gazeta “Bild” dhe televizioni “Sky”, sipas të cilëve në kompleks u ul edhe një helikopter shpëtimi.

“Vincent Kompany u detyrua të marrë trajtim mjekësor të premten, pasi u rrëzua gjatë stërvitjes së ekipit amator të FC Bayern”, njoftoi klubi. Sipas Bayernit, belgu 40-vjeçar po i nënshtrohet ekzaminimeve të hollësishme dhe do të mbetet nën kujdesin e mjekëve.

Eberl: I japim gjithë kohën që i duhet

“Shëndeti i Vincent Kompanyt është prioriteti ynë kryesor. Vinnie po merr gjithë kujdesin dhe mbështetjen mjekësore të nevojshme, si dhe gjithë kohën që i duhet”, deklaroi drejtori sportiv Max Eberl. Ai shtoi se stafi teknik i trajnerit, tek i cili klubi ka “besim të plotë”, do të marrë përsipër detyrat e tij.

Episodi vjen pas disa ditësh të vështira për Kompanyn. Javën e kaluar u raportua se ai vuante nga një infeksion viral që i prekte këmbët, gjë që hodhi dyshime mbi praninë e tij në ndeshjen e Champions League ndaj Arsenalit të mërkurën. Eberl kishte treguar më parë se trajneri, i cili sipas raportimeve kishte nevojë për ndihmë për të ngjitur shkallët, po përballej me infeksionin dhe me një dëmtim në ijë.

Kompany u rikthye në stol për ndeshjen me Arsenalin, që përfundoi 2-2, dhe kishte rifilluar stërvitjet vetëm pak ditë më parë. Ish-kapiteni i Belgjikës drejton Bayernin që nga maji i vitit 2024.