“Mos prekni studentët!”: pedagogët marshojnë drejt Kuvendit, studentët e Mjekësisë i bashkohen protestës

Protesta e studentëve hyri të enjten në ditën e dhjetë me një zgjerim të ri: pedagogët e universiteteve publike dolën në marshim drejt Kuvendit, ku po zhvillohej seanca plenare, ndërsa studentët e Fakultetit të Mjekësisë njoftuan se i bashkohen revoltës.

Pedagogët u mblodhën para godinës qendrore të Universitetit Politeknik të Tiranës dhe prej andej u nisën drejt parlamentit. Ata mbanin pankarta me mbishkrime si “Studentët nuk janë vetëm”, “Kur goditet studenti, goditet e ardhmja”, “Jemi me studentët” dhe “Mos prekni studentët”. Sipas BalkanWeb, në afërsi të Kuvendit policia u përpoq t’i ndalonte pedagogët të bashkoheshin me studentët, ndërsa këta të fundit hoqën barrierat.

Kovaçi: Nesër sërish në protestë

Kreu i Sindikatës së Pedagogëve, Sandër Kovaçi, tha se pedagogët u mblodhën në orën 10:00, siç kishin paralajmëruar, për të shprehur solidaritet me studentët dhe për të dënuar dhunën ndaj tyre. “Jemi kundër dhunës së policisë ndaj studentëve”, deklaroi ai, duke shtuar se “dhuna nuk ofron zgjidhje”. Kovaçi u bëri thirrje të gjithë atyre që mundin të bashkohen me studentët para parlamentit dhe njoftoi se pedagogët do të mblidhen sërish të premten në të njëjtën orë.

Sindikata kishte shpallur një ditë më parë bojkot të mësimit pa afat në universitetet publike. Të mërkurën, mësimi u bojkotua edhe në Korçë e Elbasan, ndërsa në Vlorë vijoi normalisht.

Policia rrethon parlamentin

Që në mëngjes, perimetri i Kuvendit ishte rrethuar me barriera metalike. Euronews Albania raportoi se para parlamentit ishin vendosur dy autobotë uji dhe forca të shumta të FNSH-së dhe të njësisë “Shqiponja”. Brenda sallës, mazhoranca votonte projektligjet mes përplasjesh me opozitën.

Protestuesit e kanë refuzuar disa herë ftesën e kryeministrit Rama për dialog dhe vijojnë të kërkojnë dorëheqjen e tij.