Ministria e Shëndetësisë: 13 të lënduar nga protesta, mes tyre 3 policë dhe 2 gazetarë; 4 mbeten në Traumë

Ministria e Shëndetësisë dhe Mirëqenies Sociale njoftoi të shtunën në mbrëmje se 13 persona kishin marrë ndihmë mjekësore si pasojë e protestës në Tiranë, sipas të dhënave deri në orën 19:45. Mes tyre janë tetë protestues, tre efektivë të policisë dhe dy përfaqësues të medias.

Në Spitalin Universitar të Traumës u paraqitën nëntë të lënduar, shtatë protestues dhe dy përfaqësues të medias. Pesë prej tyre u larguan pasi morën trajtimin e nevojshëm, ndërsa katër protestues vijonin ekzaminimet dhe trajtimin. Sipas ministrisë, një protestues me dëmtim në sy po ekzaminohej dhe ishte jashtë rrezikut për jetën.

Policët me dëmtime në sy

Në Qendrën Spitalore Universitare “Nënë Tereza” u paraqitën dy persona, një protestues dhe një efektiv policie, të cilët u larguan pasi morën ndihmë mjekësore. Ndërkohë, dy efektivë të tjerë u paraqitën në Poliklinikën e Specialiteteve nr. 2 në Tiranë me dëmtime në sy dhe u larguan pas trajtimit.

Në total, sipas bilancit të ministrisë, nëntë persona ishin larguar nga strukturat shëndetësore, ndërsa katër protestues mbeteshin në trajtim. Ministria nuk dha detaje për rrethanat e lëndimeve.

Bilanci u rrit gjatë pasdites

Në një njoftim të mëparshëm pasdite, ministria kishte raportuar tetë të lënduar, të trajtuar në QSUNT dhe në Traumë, mes tyre sipas Shqiptarja.com edhe një deputet dhe dy gazetarë. Bilanci u rrit ndërsa përplasjet mes protestuesve dhe policisë vazhdonin në bulevardin “Dëshmorët e Kombit”, në sheshin Skënderbej dhe në rrugët përreth. Protestuesit hodhën gurë, molotovë e mjete piroteknike, ndërsa policia përdori gaz lotsjellës, autobotë uji dhe fishekë gome.