Malaj: Paketa fiskale 2027 nuk rrit taksat, i rishpërndan; Dhoma Italiane kërkon analizë të plotë të efekteve

Ministri i Financave, Petrit Malaj, mbrojti të premten në Komisionin e Ekonomisë ndryshimet e Paketës Fiskale 2027, duke kundërshtuar kritikat se ato rrisin barrën tatimore. “Nuk kemi një rritje të taksave, por një rishpërndarje të taksave”, deklaroi ai, duke e cilësuar paketën me efekt neutral për buxhetin.

Llogaria e ministrit

Sipas Malajt, paratë nga rritja e tatimit mbi dividendin do të kalojnë te zgjerimi i fashës së pagës, që shkon nga 200 mijë në 300 mijë lekë, pra si të ardhura shtesë për shtresën e mesme. Ai tha se ulja e TVSH-së për produktet bazë nga 20% në 6% kushton më shumë se sa sjell rritja e TVSH-së standarde nga 20% në 21%. Gropa prej rreth 20 milionë eurosh, sipas tij, mbulohet me uljen e pragut të regjistrimit për TVSH nga 10 milionë në 5 milionë lekë, një kërkesë e institucioneve ndërkombëtare, përfshirë FMN-në.

Ministri shtoi se heqja e taksës së qarkullimit nga karburantet dhe kalimi i saj te taksat vjetore të mjeteve krijon një minus prej rreth 5 miliardë lekësh. “Efekti është zero ose minus 300 milionë lekë për buxhetin e shtetit”, tha Malaj, duke përmendur akcizën e duhanit, e rritur për t’u përafruar me BE-në, si të vetmen të ardhur shtesë.

Biznesi italian kërkon stabilitet

Po të premten, Dhoma Italiane e Tregtisë në Shqipëri (CCIA) kërkoi që propozimet të shoqërohen me një analizë të plotë të efekteve ekonomike. Ajo mirëpriti ruajtjen e tatimit mbi fitimin në 15% dhe TVSH-në 6% për ushqimet bazë, por theksoi se efekti i kësaj mase varet nga reflektimi në çmimet përfundimtare. CCIA shprehu shqetësim për rritjen e tatimit mbi dividendin nga 8% në 15% dhe të TVSH-së standarde në 21%, duke vënë në dukje se neutraliteti për buxhetin nuk do të thotë domosdoshmërisht shpërndarje e barabartë e kostove mes bizneseve dhe familjeve.

Dhoma kërkoi procedura më të thjeshta, rimbursime në kohë dhe vazhdimin e konsultimit gjatë shqyrtimit në Kuvend. Në mëngjes, edhe Shoqata e Investitorëve të Huaj (FIAA) i kishte bërë thirrje qeverisë të rishqyrtojë masat.