Malaj: 24 miliardë lekë për pensionet në 2027, indeksim në prill, bonusi i bebeve mujor deri në 5 vjeç

Ministri i Financave, Petrit Malaj, prezantoi të premten në Komisionin për Ekonominë, Punësimin dhe Financat projektligjin për buxhetin e vitit 2027, i cili parashikon mbi 10 miliardë euro shpenzime publike. Malaj e paraqiti mbështetjen për moshën e tretë si një nga prioritetet kryesore të dokumentit.

Pensionet: indeksim në prill dhe bonus i dyfishuar

Sipas ministrit, politika për pensionet në vitin 2027 arrin në total 24 miliardë lekë, ose rreth 250 milionë euro. Indeksimi i pensioneve parashikohet në prill 2027, me një fond prej rreth 1.35 miliardë lekësh. Nëse llogaritet edhe afrimi në kohë i indeksimit, kostoja për buxhetin shkon në rreth 4 miliardë lekë, ose 40 milionë euro.

Malaj tha gjithashtu se nga 1 janari 2027 dyfishohet bonusi mujor për pensionistët, sipas kategorive të përcaktuara, me një kosto totale të parashikuar prej 20 miliardë lekësh në vit.

Familjet dhe fëmijët

Në paketën sociale përfshihen dyfishimi i pagesave për fëmijët me aftësi të kufizuara dhe njohja e kontributeve të sigurimeve shoqërore e shëndetësore për kujdestarët e tyre. Bonusi i bebeve vijon, por tani si mbështetje mujore deri në moshën 5 vjeç, me vlerë që rritet progresivisht për fëmijën e parë, të dytë dhe të tretë. Për shërbimet sociale dhe strehimin e përballueshëm janë planifikuar rreth 1.3 miliardë lekë në vit, ndërsa vijon kompensimi nga tatimi mbi të ardhurat personale deri në 48,000 lekë për familjet me fëmijë nën 18 vjeç.

Në total, financimi për mbrojtjen sociale arrin 279.7 miliardë lekë, rreth 30% e shpenzimeve buxhetore. Arsimi parashikohet me 93.6 miliardë lekë, përfshirë 500 milionë lekë për programin “Pas Shkollës” deri në orën 17:00, ndërsa shëndetësia me 87.2 miliardë lekë, 6 miliardë më shumë se buxheti fillestar i 2026-s. Investimet publike në 2027 llogariten në 6.9% të PBB-së, ose 201.5 miliardë lekë.