Lugina e Preshevës voton me listë të përbashkët: mbi 12 mijë votues në Preshevë deri pas mesditës

Shqiptarët e Preshevës, Bujanocit dhe Medvegjës votuan të dielën në zgjedhjet e parakohshme parlamentare të Serbisë me një listë të vetme, “Koalicioni Shqiptar”, numri 17 në fletëvotim, ku janë bashkuar tetë parti shqiptare.

Pjesëmarrja gjatë ditës

Sipas Komisionit Zgjedhor Komunal të Bujanocit, të cituar nga portali lokal Bujanovačke dhe Albinfo, deri në orën 12:00 kishin votuar 6,133 qytetarë. Komuna ka 44,665 votues të regjistruar dhe 59 vendvotime. Kryetari i komisionit, Leon Memeti, tha se të gjitha vendvotimet u hapën në orën 07:00; një kuti votimi e dëmtuar në Sejacë dhe mungesa e ndriçimit në Llillancë u zgjidhën gjatë mëngjesit.

Gazetarja e Klan Kosovës, Altiana Zogaj, raportoi se pas një mëngjesi të ngadaltë, pas mesditës në Preshevë kishin votuar mbi 12 mijë qytetarë, me një tablo të ngjashme në Bujanoc dhe pa parregullsi të raportuara. Sipas saj, me një pjesëmarrje kaq të lartë gjasat janë për një ose dy ulëse shqiptare.

Thirrjet nga Prishtina dhe Tirana

Që në mëngjes, kryeministri i Kosovës, Albin Kurti, u bëri thirrje shqiptarëve të Luginës të votojnë masivisht. “Diskriminimi, përjashtimi dhe shtypja kërkojnë një përgjigje të vendosur demokratike”, tha ai, duke u kërkuar edhe shqiptarëve të Kosovës me të drejtë vote në këto komuna të kthehen për të votuar. Thirrje të ngjashme bënë presidentja Justina Shiroka-Pula dhe kryeparlamentarja Albulena Haxhiu.

Edhe ministri i Jashtëm i Shqipërisë, Ferit Hoxha, u bëri thirrje shqiptarëve të Luginës të marrin pjesë, duke u thënë se “zëri juaj ka peshë”. Para zgjedhjeve, bartësi i listës, Shaip Kamberi, kishte thënë se një pjesëmarrje deri në 70% do t’i jepte koalicionit shanse të mira për mandatin e dytë.