Konjufca kryeson mbledhjen e parë të grupit për strategjinë e apelit në Hagë: “UÇK-ja na bashkon të gjithëve”

Zëvendëskryeministri dhe ministri i Punëve të Jashtme, Glauk Konjufca, kryesoi të mërkurën mbledhjen konstituive të Grupit Punues për hartimin dhe harmonizimin e Strategjisë Shtetërore lidhur me procedurat e apelit para Dhomave të Specializuara në Hagë.

Plani i punës

Sipas Konjufcës, në mbledhje u diskutuan drejtimet kryesore të strategjisë, u caktuan grupet përgjegjëse për hartimin e saj dhe u përcaktua plani i përgjithshëm i punës. “Angazhimi ynë është që krerët e luftës sonë çlirimtare ta kenë mbështetjen e plotë të shtetit të Kosovës në betejën e tyre në apel”, deklaroi ai, duke shtuar se institucionet do ta mbrojnë të vërtetën e luftës në arenën ndërkombëtare dhe do të kundërshtojnë çdo përpjekje për shtrembërimin e saj.

“UÇK-ja na bashkon të gjithëve përtej dallimeve, sepse lufta e saj çlirimtare qëndron në themelet e lirisë dhe të shtetit tonë”, tha Konjufca, sipas të cilit të gjitha institucionet dhe forcat politike mbajnë përgjegjësi në këtë proces.

Opozita në tryezë

Ushtruesja e detyrës së kryetares së PDK-së, Vlora Çitaku, anëtare e grupit, tha se pjesëmarrja e partive parlamentare shqiptare dëshmon një vetëdije të përbashkët për rëndësinë e çështjes dhe se puna po bëhet në frymën e Deklaratës së Kuvendit të 28 shtatorit. Ajo e cilësoi të padrejtë aktgjykimin e shkallës së parë dhe tha se paralelisht po vazhdon puna për një ligj që synon të forcojë mbrojtjen e të drejtave të çlirimtarëve. “Në asnjë ditë dhe në asnjë moment, çlirimtarët nuk do t’i lëmë vetëm!”, shkroi Çitaku.

Përfaqësuesi i PDK-së në grup, Enver Hoxhaj, tha se mbështetja për krerët e UÇK-së është përgjegjësi shtetërore dhe detyrim ndaj historisë së Kosovës, duke u zotuar se do të punojë që ky detyrim të kthehet në veprime konkrete në procesin e apelit.