KLSH: 135 milionë euro dëm e efekte negative në zbatimin e buxhetit 2025, konkluzion i kualifikuar

Kontrolli i Lartë i Shtetit (KLSH) ka dhënë konkluzion të kualifikuar për zbatimin e buxhetit të shtetit për vitin 2025, duke gjetur mospërputhje të rëndësishme me kërkesat ligjore në planifikim, ekzekutim dhe raportim. Sipas aneksit të raportit, të cituar nga revista Monitor, auditimet kanë evidentuar 171.9 milionë lekë dëm ekonomik dhe 12.3 miliardë lekë efekte financiare negative, gjithsej rreth 12.5 miliardë lekë, ose afërsisht 135 milionë euro.

Kontrata përtej fondeve

Problemi më i madh lidhet me investimet publike. Në 44 raste janë nisur procedura prokurimi për kontrata me vlerë 16.8 miliardë lekë, ndonëse fondet në dispozicion ishin më të ulëta. Në 39 projekte të tjera janë marrë angazhime që tejkalonin fondet e miratuara me 4.28 miliardë lekë. KLSH gjeti edhe parapagime prej 1.15 miliardë lekësh për tre projekte pa dokumentacion justifikues; në dy prej tyre parapagimi arriti në 20% të kontratës, kundrejt kufirit të lejuar prej 10%.

Raporti përmend gjithashtu copëzim fondesh, fitues që nuk plotësonin kriteret, mosaplikim penalitetesh dhe pagesa për punime të pakryera ose pa dokumente mbështetëse.

Investime pa projekte, plan i rishikuar pas afatit

Gjatë vitit 2025 u çelën fonde investimi prej 5.26 miliardë lekësh pa u detajuar në projekte konkrete, ndërsa 188 projekte me 3.59 miliardë lekë të planifikuara nuk patën asnjë realizim deri në fund të vitit. Shpenzimet kapitale dolën 25.45 miliardë lekë nën planin përfundimtar, kryesisht nga vonesat në projektet me financim të huaj.

KLSH regjistroi 28,412 ndryshime në zërat buxhetorë, nga 3,106 rishikime, rreth 17% e tyre në dhjetor. Mbi 20% e shpenzimeve vjetore u kryen vetëm në muajin e fundit, ndërsa plani i vitit 2025 u rishikua deri në shkurt 2026. Raporti vë në dukje edhe rritjen e ndjeshme të stokut të borxhit tatimor e doganor.