Java e 7-të: Karrica shënon tripletë për Vorën, Egnatia ndjek Teutën, Tirana fiton me vështirësi

Java e shtatë e Abissnet Superiore u mbyll të dielën me Teutën ende në krye të renditjes me 19 pikë, pasi durrsakët fituan 2-0 në transfertë ndaj Dinamo City. Egnatia qëndron vetëm një pikë më poshtë, ndërsa Dinamo zbret në vendin e tretë me 12 pikë.

Spektakli më i madh i javës u pa në Vorë, ku vendasit mposhtën Partizanin 4-1. Bernard Karrica ishte protagonisti me tre gola, në minutat 17, 50 me penallti dhe në shtesën e pjesës së dytë, ndërsa golin tjetër e shënoi Klement në minutën e 73-të. Për kryeqytetasit shënoi Hjumen me penallti në minutën e 62-të. Ishte debutimi i trajnerit kroat Mislav Karoglan në stolin e Partizanit, i cili mbetet në vendin e fundit me vetëm 4 pikë.

Egnatia nuk ndalet

Egnatia mposhti në shtëpi Vllazninë 3-1. Rrogozhinasit shkuan në avantazh me penalltinë e Albanezes në minutën e 9-të dhe e dyfishuan me Adjesën në minutën e 41-të. Perez e ngushtoi diferencën për shkodranët në minutën e 59-të, por Gruda vulosi fitoren në minutën e 86-të.

Të shtunën, Tirana fitoi 1-0 ndaj Laçit në një ndeshje me tre gola të anuluar për pozicion jashtë loje. Goli i vetëm erdhi në minutën e 77-të, kur Daci devijoi në rrjetë një aksion të Berishës. Bardhebluët arritën kështu fitoren e dytë radhazi në kampionat. Po të shtunën, Skënderbeu përmbysi Elbasanin dhe fitoi 2-1, duke i dhënë trajnerit Bismark suksesin e parë në kampionat në stolin korçar.

Pas shtatë javësh, Tirana renditet e katërta me 11 pikë, Vora e pesta me 8, ndërsa Elbasani dhe Laçi ndajnë vendin e gjashtë me nga 7 pikë. Skënderbeu ka 6 pikë, Vllaznia 5 dhe Partizani 4.