Haxhiu për protestat në Shqipëri: Vetëvendosje nuk ka bërë thirrje për pjesëmarrje, dhuna të ndalet

Kryetarja e Kuvendit të Kosovës, Albulena Haxhiu, reagoi të hënën për protestat që po zhvillohen prej ditësh në disa qytete të Shqipërisë, duke mohuar se Lëvizja Vetëvendosje ka bërë thirrje për t’iu bashkuar atyre.

Haxhiu tha se ajo që ndodh në Shqipëri i prek të gjithë shqiptarët, pasi “Shqipëria për ne është Shtëpi”. Ajo theksoi se institucionet shqiptare, përfshirë Kuvendin, Presidencën dhe Qeverinë, kanë detyrimin të merren me kërkesat e studentëve, duke shtruar pyetjen nëse këto janë po ato kërkesa që kanë nisur vite më parë.

Kundër dhunës nga të dyja palët

Sipas saj, Kosova nuk e mbështet dhunën, qoftë atë të policisë ndaj protestuesve, qoftë anasjelltas, dhe dhuna duhet ndalur nga të dyja anët. Haxhiu vlerësoi se arroganca nga pushteti i nxit protestat dhe kërkoi seriozitet e pjekuri në trajtimin e situatës.

Lidhur me partinë e saj, ajo tha se Vetëvendosje nuk ka ftuar kurrë mbështetësit të marrin pjesë në protestat në Shqipëri. Duke pranuar se lëvizja ka mbështetje të gjerë, Haxhiu shtoi se partia nuk mund të mbahet përgjegjëse nëse disa nga mbështetësit e saj vendosin të protestojnë atje.

Deklarata vjen në ditën e shtatë të protestave në Tiranë, të shoqëruara me përplasje mes protestuesve dhe policisë.