Gjykata e Posaçme nuk e zhvillon gjyqin e Metës dhe Kryemadhit pa avokatë, seanca shtyhet për 5 nëntor

Gjykata e Posaçme refuzoi të enjten të vijonte gjykimin e ish-presidentit Ilir Meta dhe të Monika Kryemadhit pa praninë e avokatëve, dhe e shtyu seancën për më 5 nëntor. Për seancën e radhës gjykata caktoi edhe një avokat.

Sipas gazetares së Top Channel, Anila Hoxha, avokatët nuk morën pjesë pavarësisht një vendimi të Apelit Administrativ, me argumentin se nuk janë njoftuar zyrtarisht se Dhoma Kombëtare e Avokatisë e ka pezulluar bojkotin.

Meta dhe Kryemadhi kërkuan të vijonin

Meta tha se mungesa e prokurorit Kllapi “nuk është shenjë e mirë” dhe kërkoi të mbrohej vetë. Ai argumentoi se mosmarrëveshja me avokatët duhej zgjidhur më herët, duke qenë se rreth 600 procese gjyqësore ishin bllokuar. Kryemadhi e quajti bojkotin “shpërdorim të profesionit të avokatit” dhe kërkoi që seanca të vijonte siç ishte rënë dakord herën e kaluar.

Prokurori Arben Kraja tha se mungesa e njërit prokuror nuk përbën shkelje dhe se akuzat e rënda kërkojnë praninë e një avokati.

Kryemadhi: SPAK ka shkelur procedurat

Pas shtyrjes, Kryemadhi u tha gazetarëve se seanca ishte “qesharake” dhe se gjykatat nuk e mbajnë më fjalën. Sipas saj, procesi ndodhet në fazën e parashtrimeve të palëve dhe ajo nuk ka nevojë për avokat për të folur. Ajo e quajti absurd qëndrimin e SPAK-ut si garant i të drejtës së saj për t’u mbrojtur me avokat dhe e akuzoi prokurorinë për shkelje gjatë kontrollit të banesës, sekuestrimit të telefonit dhe trajtimit të dëshmitarëve. Të gjitha këto janë pretendime të mbrojtjes.